$17 mlrd kelisimi jáne strategııalyq seriktestik: Toqaev pen Tramp kezdesýiniń nátıjesi jarııalandy

VAShINGTON. KAZINFORM — Aq úıdegi kezdesýde Memleket basshysy Vashıngtonǵa saparmen kelýge shaqyrǵany jáne qazaqstandyq delegatsııaǵa kórsetken qonaqjaı kóńili úshin AQSh Prezıdentine rızashylyq bildirdi. Bul týraly Aqordanyń baspasóz qyzmeti habarlady. 

Qasym-Jomart Toqaev Donald Tramptyń prezıdenttik laýazymynyń tarıhı sıpatyna toqtalyp, onyń basshylyǵymen AQSh álemniń jetekshi ekonomıkalyq, saıası jáne tehnologııalyq derjavasy retindegi pozıtsııasyn kúsheıtip kele jatqanyn atap ótti.

Qazaqstan Prezıdentiniń aıtýynsha, Amerıka kóshbasshysy jer júziniń qaýipsizdigin, turaqtylyǵy men órkendeýin qamtamasyz etýde sheshýshi ról atqarady.

Memleket basshysy Qazaqstan AQSh Prezıdentiniń bitimgerlik bastamalaryn tolyq qoldaıtynyn jetkizdi. Sonyń ishinde keleshekte Orta dálizdi odan ári damytýǵa yqpal etetin «Tramptyń halyqaralyq beıbitshilik jáne órkendeý jolyna» (TRIPP) erekshe nazar aýdardy.

Donald Tramp AQSh-tyń Qazaqstanmen kópjosparly keńeıtilgen strategııalyq seriktestikti damytýǵa nıetti ekenin rastady.

Sapar aıasynda Qazaqstan men Qurama Shtattary arasynda jalpy somasy 17 mıllıard dollardan asatyn kommertsııalyq kelisimderge qol qoıyldy.

Áńgimelesý barysynda ekijaqty yqpaldastyqtyń keń kólemdegi máseleleri jan-jaqty talqylandy, ózara tıimdi yntymaqtastyqtyń perspektıvti baǵyttary naqtylandy.

Sonymen qatar prezıdentter halyqaralyq kún tártibiniń ózekti máseleleri jóninde pikir almasty.

Buǵan deıin Donald Tramp Qazaqstan Ibrahım kelisimine qosylǵan birinshi el ekenin atap ótti.