1,7 mln oqýshy qazaq tili men ádebıetinen emtıhan tapsyrady
ASTANA. KAZINFORM – Bıyl mektep bitirý attestattaryn túlekterge tapsyrý saltanaty 18-20 maýsym aralyǵynda ótkiziledi. Bul týraly Ortalyq kommýnıkatsııalar qyzmetindegi brıfıngte Oqý-aǵartý mınıstrligi Orta bilim berý komıtetiniń tóraǵasy Qanybek Jumashev aıtty.
- 2024-2025 oqý jylynyń qorytyndysy boıynsha ulttyq bilim berý derekter qorynyń málimetterine sáıkes, elimizde barlyǵy 8 myńnan astam mektep bar, onda 4 mln-ǵa jýyq oqýshy bilim alýda. Bıyl 9 synypty 364 myńnan astam bala aıaqtaıdy. Olar aldaǵy ýaqytta 10-synypty jalǵastyrý nemese kolledjge túsý týraly sheshim qabyldaıtyn bolady. Sondaı-aq 217 myńnan astam túlek 11 synypty támamdaıdy. Oqý-aǵartý mınıstriniń buıryǵyna sáıkes, mektepterde oqý merzimi dástúrli túrde 34 aptaǵa sozylady, oqý 25 mamyrda aıaqtalady,- dedi ol.
Onyń aıtýynsha, orta bilim berý uıymdarynda sabaq aptasynyń bes kúndik ekenin eskere otyryp, 1-10 synyp oqýshylary úshin sońǵy sabaq kúnin 23 mamyrda «Bilimim — otanyma» taqyrybynda biryńǵaı synyp saǵaty formatynda ótkizý týraly usynym berildi. Synyp saǵatynyń maqsaty: balalardy jyl boıy alǵan biliminiń nátıjesin qorytyndylaı bilýge tárbıeleý.
- 11-synyp túlekteri úshin saltanatty is-shara mektep ákimshiliginiń sheshimimen 23 nemese 24 mamyrda mektep qabyrǵasynda ótkiziledi. Saltanatty is-sharany ótkizý formatyn, qatysýshylar quramyn bilim berý uıymdary ózderi anyqtaıdy. Sonymen qatar Oqý-aǵartý mınıstrliginiń buıryǵyna sáıkes 9 jáne 11 synyp oqýshylary úshin qorytyndy memlekettik emtıhandardyń merzimderi aıqyndaldy. 9-synyp oqýshylary úshin qorytyndy memlekettik emtıhandar 2025 jylǵy 29 mamyr men 10 maýsym aralyǵynda ótedi dep josparlanýda. Al 11 synyp túlekteri 30 mamyr men 16 maýsym aralyǵynda memlekettik bitirý emtıhandaryn tapsyrady, - dedi Qanybek Jumashev.
Komıtet tóraǵasy ótken jyly tuńǵysh ret barlyq mektepte oqytý tiline qaramaı qazaq tili jáne ádebıet páninen aralyq emtıhandar engizilgenin esken saldy.
- Aralyq emtıhandy 5, 6, 7, 8, 10 synyp oqýshylary 27-31 mamyr aralyǵynda tapsyrady. Oǵan 1,7 mln oqýshy qatysady. Bul emtıhannyń maqsaty - oqýshylardyń memlekettik tildi oqyp úırený deńgeıin anyqtaý jáne bilimderin shyńdaýǵa daǵdylandyrý. Bul emtıhan negizinen 4 baǵytta ótedi: tyńdalym, aıtylym, oqylym, jazylym. Bul halyqaralyq CREF standartyna sáıkes. Sonymen qatar, mektep bitirý attestattaryn túlekterge tapsyrý saltanatyn 18-20 maýsym aralyǵynda ótkizý josparlanǵan», - dedi ol.
Aıta keteıik, orta bilim berý júıesinde kadr tapshylyǵy tolyq joıyldy.