1,7 mln qazaqstandyq kredıtin tóleı almaı otyr – Májilis tóraǵasy
Qazir halyqtyń 84 paıyzynda, ıaǵnı 8,4 mıllıonnan astam adamnyń qaryzy bar. Bul týraly Májilistegi «Halyqtyń shamadan tys kredıt alýyn azaıtý jáne qarjylyq saýattylyqty arttyrý» taqyrybyndaǵy Parlament tyńdaýynda palata tóraǵasy Erlan Qoshanov aıtty, dep habarlaıdy Kazinform.
«Jasyratyny joq, qazir bankterden shekteýsiz kredıt alyp, qaryzǵa belshesinen batyp otyrǵan azamattarymyz kóp. «Halyq nesıe qamytyn kıip otyr» dese de bolady. Adamdardyń nesıege táýeldiligi men qarjylyq saýatynyń tómendigi úlken áleýmettik problemaǵa aınaldy.
Búgingi jıynda biz osy túıtkildi jan-jaqty talqylaımyz. Osy maqsatta jaýapty organdardy – Úkimet múshelerin, agenttikter men quzyrly mekemeler basshylaryn arnaıy shaqyrdyq. Ózderińiz bilesizder, Memleket basshysy Joldaýynda nesıe máselesine keńinen toqtalyp, ony sheshý joldaryn qarastyrý týraly tapsyrma bergen bolatyn. Depýtattar da bul túıtkilmen jaqsy tanys. Óıtkeni, biz aımaqtarǵa jıi shyǵamyz. Meniń ózim de talaı óńirde bolyp, halyqpen júzdestim. Kóbiniń aıtatyny bir nárse, ol – nesıege táýeldilik. Bul, ókinishke qaraı, jalpyhalyqtyq sıpat alǵan qubylysqa aınalyp tur», – dedi E. Qoshanov.
Palata spıkeriniń sózine qaraǵanda, qazir halyqtyń 84 paıyzynda, ıaǵnı 8,4 mıllıonnan astam adamnyń qaryzy bar eken. Keıingi bir jarym jylda bul kórsetkish 27 paıyzǵa artqan.
«90 kúnnen keshiktirilgen qaryz kólemi – shamamen 1,4 trln teńge. ıAǵnı, 1,7 mıllıon adam qaryzyn ýaqytyly tóleı almaı otyr degen sóz. Osynyń bári nesıe problemasynyń qanshalyqty asqynyp ketkenin kórsetedi»,– dedi Májilis tóraǵasy.
