17 myńnan astam áleýmettik tólem avtomatty túrde taǵaıyndaldy
ASTANA. KAZINFORM — Memlekettik áleýmettik saqtandyrý qory (budan ári – MÁSQ) 2025 jylǵy 15 qazanda iske qosylǵan áleýmettik tólemderdi avtomatty túrde taǵaıyndaý jónindegi pılottyq jobanyń aralyq qorytyndysyn shyǵardy. Bul týraly Eńbek jáne áleýmettik qorǵaý mınıstrligi málim etti.
Vedomstvonyń málimetinshe, adamı faktordy joıýǵa baǵyttalǵan jańa algorıtm jumys istegen eki aıda júıede 33 743 ótinish qaraldy, onyń ishinde 17 284 ótinish boıynsha avtomatty rejımde oń sheshim qabyldanǵan.
Jańa tásildi engizýdiń negizgi maqsaty — memlekettik qyzmetterdi kórsetý merzimderin bir jumys kúnine deıin qysqartý jáne ótinimderdi qaraýdyń negizgi kezeńderin ońtaılandyrý esebinen protsesterdiń ashyqtyǵyn arttyrý bolyp tabylady.
Joba «Elektrondyq úkimet» (egov.kz) portaly, elektrondyq eńbek bırjasy (enbek.kz), ekinshi deńgeıli bankterdiń mobıldi qosymshalary jáne proaktıvti qyzmet arqyly kelip túsken ótinishter negizinde qalyptastyrylǵan elektrondyq is maketterin qamtıdy.
Elektrondyq ótinishter memlekettik organdardyń aqparattyq júıelerinde keshendi tekserýden ótedi. Júıe tólem alý quqyǵynyń bastalýyn, áleýmettik aýdarymdardy tóleýdiń ýaqtylyǵy men durystyǵyn, sondaı-aq qujattardyń tolyq paketiniń bolýyn avtomatty túrde rastaıdy.
Eger ótinish belgilengen krıterıılerge sáıkes kelse, sheshim avtomatty túrde qabyldanady, sodan keıin ótinish berýshige SMS-habarlama jiberiledi. Mundaı ótinishter boıynsha sheshim qabyldaýǵa adamnyń qatysýy tolyǵymen alynyp tastaldy. Júıe qandaı da bir sáıkessizdikterdi anyqtaǵan jaǵdaıda elektrondyq is maketi MÁSQ fılıaldarynyń mamandarynyń qaraýyna avtomatty túrde beriledi.
Aıta ketý kerek, pılottyq joba tek taǵaıyndaý týraly ǵana emes, sonymen qatar áleýmettik tólemderdi taǵaıyndaýdan bas tartý, mólsherin qaıta esepteý, toqtata turý jáne toqtatý týraly sheshimderdi avtomatty túrde shyǵarýdy kózdeıdi. Avtomatty sheshimderdiń durystyǵyna monıtorıngti MÁSQ mamandary kúndelikti júrgizip otyrady.
Aıta keteıik, 54 myń otbasy ataýly áleýmettik kómek aldy.