17 myń shaqyrym elektr jelilerin jańǵyrtý tolyq aıaqtaldy
ASTANA. KAZINFORM – Kúzgi-qysqy kezeńge daıyndyq aıasynda elimizde elektr jelilerine kúrdeli jóndeý boıynsha josparlanǵan jumystardyń kólemi oryndaldy.
Bıyl 17,1 myń shaqyrym elektr berý jelisi, 444 qosalqy stantsııa jáne 3,4 myńnan astam taratý jáne transformatorlyq pýnkt jóndeldi.
Jumystar elimizdiń barlyq óńirinde júrgizilip, elektrmen jabdyqtaýdyń turaqty jumysyn qamtamasyz etýge baǵyttalǵan.
Jóndeý jumystarynyń aýqymdy kólemi Aqmola oblysynda iske asyryldy. Óńirde 2,6 myń shaqyrymnan astam elektr berý jelisi, 49 qosalqy stantsııa jáne 555 taratý jáne transformatorlyq pýnkt jóndeldi.
Pavlodar oblysynda 2 444 shaqyrym elektr berý jelisine, 52 qosalqy stantsııaǵa jáne 609 taratý jáne transformatorlyq pýnktke kúrdeli jóndeý júrgizildi.
Jambyl oblysynda 1,8 myń shaqyrymnan astam elektr berý jelisi, 63 qosalqy stantsııa jáne 316 taratý jáne transformatorlyq pýnkt jóndeýden ótti.
Atqarylǵan sharalar elektr jelileri sharýashylyǵynyń jylytý maýsymynan senimdi ótýge daıyndyǵyn qamtamasyz etýge múmkindik beredi.
Aıta ketelik Qazaqstan 2029 jylǵa qaraı elektr energııasy profıtsıtine shyǵýdy josparlap otyr.
