17 mamyrda el aýmaǵynyń basym bóliginde jel kúsheıedi
ASTANA. QazAqparat - Atmosferalyq aǵyndardyń ótýine baılanysty sársenbi, 17 mamyrda Qazaqstannyń basym bóliginde qubylmaly aýa raıy saqtalady, keı jerlerinde jańbyr jaýyp, naızaǵaı oınaıdy, tuman, jeldiń kúsheıýi kútiledi, ońtústikte shańdy daýyl turady, tek batys jáne soltústik- batysta aýa raıy jaýyn-shashynsyz.
Qazgıdomettiń habarlaýynsha, Qyzylorda oblysynyń keı jerlerinde shań kóterilip, jeldiń jyldamdyǵy 15-20 m/s jetedi, naızaǵaı jarqyldap, burshaq jaýýy múmkin.
Ońtústik Qazaqstan, Shyǵys Qazaqstan oblystarynyń keı jerlerinde burshaq kútiledi, jeldiń kúshi 15-20 m/s bolady. Almaty, Pavlodar, Jambyl oblystarynyń keı jerlerinde jel 15-20 m/s kúsheıedi. Jambyl oblysynda jeldiń ekpini 23 m/s jetedi.
Mańǵystaý, Qaraǵandy oblystarynyń keı jerlerinde jeldiń 15-20 m/s kúsheıýi kútiledi, túnde jáne tańerteń tuman túsedi.
Soltústik Qazaqstan oblysynda túnde jáne tańerteń keı jerlerinde tuman bolady.
Túnde Aqmola, Aqtóbe, Qostanaı, Soltústik Qazaqstan, Pavlodar, Qaraǵandy oblystarynyń keı jerlerinde 0-5 gradýsqa tómendep, úsik júredi.
Kúndiz Ońtústik Qazaqstan oblysynyń keı jerlerinde óte joǵary órt qaýpi saqtalady.
