17 kúdikti, qarý, esirtki, urlanǵan janarmaı: Qaraǵandyda dızel mafııasy quryqtaldy

ASTANA. KAZINFORM — Qaraǵandy oblysynda quqyq qorǵaý organdary dızel otynyn temirjoldyń jyljymaly quramynan júıeli túrde urlap kelgen qylmystyq toptyń áreketine tosqaýyl qoıdy, dep habarlaıdy Polisia.kz.

Arnaıy operatsııany Qaraǵandy oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri UQK oblystyq departamenti jáne kóliktegi polıtsııa departamentiniń Qaraǵandy — Suryptaý jelilik polıtsııa bólimimen birlesip, Qaraǵandy oblysy kólik prokýratýrysynyń qoldaýymen júrgizdi. 

— Jedel-izdestirý is-sharalary nátıjesinde dızel urlyǵyna qatysty 28 derek anyqtaldy. 17 kúdikti qolǵa túsip, olardyń zańsyz áreketterine qatystylyǵy tekserilip jatyr. Tintý barysynda, shamamen 500 keli dızel otyny, janarmaı tasymaldaýǵa arnalǵan bos kanıstrler, 2017 jyly Reseı ІІM-de joǵalǵan retinde tirkelgen atys qarýy, 26 oq-dári, 7 telefon jáne esirtki zattary tárkilendi, — delingen vedomstvo taratqan aqparatta.

ІІM atap ótkendeı, atalǵan fakti boıynsha qylmystyq is qozǵaldy. Qazirgi ýaqytta tergeý amaldary júrgizilip jatyr.

Budan buryn Qaraǵandyda polıtsııa qaýipti oıyn uıymdastyrǵan jasóspirimdi izdestirip jatqanyn jazǵan edik.