17 qarashada ınternet óship, bank shottaryndaǵy aqsha joǵala ma: mamandar túsindirdi

ASTANA. KAZINFORM – Áleýmettik jelilerde 17 qarashada jahandyq kıbershabýyl bolyp, ınternet úsh aıǵa óshetini jáne bank shottaryndaǵy qarajat joǵalatyny týraly aqparat taralyp jatyr. Alaıda bul málimdemeler resmı derekkózderde rastalmaǵan, dep málimdedi Jalǵan aqparatqa qarsy is-qımyl ortalyǵy.

y
Foto: QR Prezıdenti janyndaǵy Ortalyq kommýnıkatsııalar qyzmetiniń Jalǵan aqparatqa qarsy is-qımyl ortalyǵy

Ortalyqtyń málimetinshe, qaýeset 1 qarashada X áleýmettik jelisinde Wesley laqap atymen tirkelgen qoldanýshynyń jazbasynan keıin tarala bastaǵan. Ol portýgal tilinde jarııalaǵan habarlamasynda darknettegi anonımdi derekkózge silteme jasaǵan.

Keıin keıbir elder turǵyndarǵa azyq-túlik pen sý qoryn jınaýǵa keńes beripti degen aqparat taraǵan. Osylaısha, bastapqyda bir-birine qatysy joq eki habarlama bir oqıǵa retinde usynylǵan.

Áleýmettik jelide taraǵan málimdemelerdiń biri – hakerler bank shottaryndaǵy aqshany jappaı joıyp jiberedi degen boljam. Alaıda bankter qarjy týraly málimetterdi birneshe derekter ortalyǵynda saqtaıdy jáne aqparattyq júıelerdi qalpyna keltirý josparlaryn ázirleıdi. Mundaı shabýyl týraly bankter de, memlekettik organdar da resmı eskertý jasaǵan joq.

Internettiń úsh aıǵa tolyq óshiriletini týraly aqparat ta negizsiz. Internet kóptegen táýelsiz jeliden turatyndyqtan, ony bir ǵana kıbershabýyl arqyly búkil álemde bir mezette isten shyǵarý múmkin emes.

– Jalǵan aqparat ózdiginen taralmaıdy. Onyń taralýyna árbir repost, úreıge toly pikir jáne «saqtyq úshin basqalarǵa da jibereıin» degen áreket sebep bolady. Kez kelgen kúmándi habarlamany bólispes buryn, aldymen onyń avtoryn jáne resmı derekkózderde jarııalanǵan aqparatty tekserińiz. Feıktiń taralýyn toqtatýdyń eń senimdi joly – oǵan nazar aýdarmaý, – delingen ortalyq aqparatynda.

Sonymen qatar 17 qarasha kúni AQSh-ta shuǵyl habarlaý júıesin josparly tekserý kózdelgen. AQSh-tyń Tótenshe jaǵdaılar jónindegi federaldyq agenttigi (FEMA) men Federaldyq baılanys komıssııasy radıo jáne telearnalar arqyly bir mınýttyq synaq sıgnalyn taratýdy josparlaǵan. Bul sharanyń jahandyq kıbershabýylǵa qatysy joq.

Qaýesetti kúsheıtken taǵy bir málimdeme – «Sımpsondar» mýltserıaly mundaı oqıǵany aldyn ala boljaǵan degen aqparat. Alaıda atalǵan epızodta 2026 jylǵy qarashaǵa qatysty eshqandaı boljam jasalmaǵan.

Qazaqstanda da tıisti mekemeler bul aqparatqa túsinikteme bergen.

Tótenshe jaǵdaılar mınıstrligi ınternettiń óshýi týraly eskertý jasamaǵanyn jáne turǵyndardy azyq-túlik qoryn jınaýǵa shaqyrmaǵanyn málimdedi.

«Qazaqtelekom» AQ telekommýnıkatsııa jelisi shtattyq rejımde jumys istep turǵanyn habarlaǵan. Al Kıbershabýyldy taldaý jáne tergeý ortalyǵy 17 qarashaǵa qatysty taraǵan aqparattyń resmı derekkózderde rastalmaǵanyn jetkizgen.

Mamandar mundaı qaýesetterdi alaıaqtar paıdalanýy múmkin ekenin de eskertedi. Atap aıtqanda, azamattarǵa bank shottaryndaǵy qarajatty «kıbershabýyldan qorǵaý» syltaýymen kúmándi qyzmetter usynylýy yqtımal.

Jalǵan aqparatqa qarsy is-qımyl ortalyǵy turǵyndardy áleýmettik jelidegi úreı týǵyzatyn habarlamalardy taratpaýǵa jáne kez kelgen málimetti resmı derekkózder arqyly tekserýge shaqyrdy.

Aıta keteıik, buǵan deıin de mamandar 17 qarashada ınternet úsh aıǵa óshetini týraly taraǵan aqparatqa túsinikteme bergen bolatyn.