17 ındýstrııalyq joba qýattylyq merzimin ıgerýden aıtarlyqtaı artta qalyp keledi
Bul týraly búgin Úkimette ótken selektorlyq keńeste QR Vıtse-premeri-Indýstrııa jáne jańa tehnologııalar mınıstri Áset Isekeshev málim etti.
Mınıstrdiń aıtýynsha, keıbir jobalardyń ıgerilýinde obektıvti jaǵdaılar kedergi bolsa, endi birazyna qatysty ákimdikter tarapynan ýaqytyly qoldaý jasalmaǵan. Tıisti sheshimder ýaqytynda qabyldanbaǵandyqtan, keıbir jobanyń júzege asý merzimderi sozylyp ketip otyr. «Máselen, byltyr iske qosylǵan 135 óndiristiń birqatary ónim shyǵara bastady jáne satylap jobalyq qýatyna kóterilýde. Alaıda, 17 joba boıynsha qýattylyqty ıgerý kestesinen aıtarlyqtaı artta qalý baıqalady. Bundaı nysandardyń basym bóligi Soltústik Qazaqstan (6 joba) jáne Shyǵys Qazaqstan (4 job) oblystarynda oryn alyp otyr. Sondyqtan da, taǵy da qaıtalap aıtaıyn, Memleket basshysynyń tapsyrmalaryna sáıkes, ákimder óz óńirlerindegi árbir joba úshin tikeleı jaýapkershilikti moınyna alýy tıis», - dedi mınıstr.
Osyǵan oraı, Á. Isekeshev jobaǵa tikeleı jaýapty ortalyq jáne jergilikti atqarýshy organdar basshylarynyń nazaryn birqatar mańyzdy máselelerge aýdardy. «Birinshiden, ulttyq holdıngter men kompanııalarmen birlese otyryp, jergilikti basshylar 2011 jyly jobalardyń ýaqytyly aıaqtalýyn qamtamasyz etetin sharalar keshenin qabyldaýy qajet. Ekinshiden, óńirlik basqarý ortalyqtarynyń jumysyn jandandyra túsken lázim. Úshinshiden, júzege asyp jatqan jobalardy udaıy qadaǵalap, problemalyq máselelerge shapshań járdem kórsetýleri tıis. Bizdiń tarapymyzdan da jiti baqylaý bolyp turady. Soǵan oraı, jyl sońyna deıin ınvestıtsııalyq jobalardy basqarýdyń arnaıy portal úlgisi júzege asady. Osy arqyly jobalardyń júzege asý barysyn, problemalardyń qalaı sheshimin taýyp jatqanyn kúndelikti qadaǵalap otyratyn bolamyz», - dedi Á. Isekeshev.
