17 aptada - 17 marafon: Qazaqstandyqtar eldiń ár qalasynda 42 km júgirdi
ALMATY. QazAqparat – 1 jeltoqsan kúni «17/17/17» aýqymdy júgirý sharasy aıaqtaldy, dep habarlaıdy QazAqparat tilshisi.
Joba avtory - bıznes-jattyqtyrýshy, almatylyq Vıktor Malchıkov. Ol 17 apta ishinde Qazaqstannyń 17 qalasynda 17 marafon ótkizemin dep aldyna maqsat qoıǵan.
«Chellendjdiń maqsaty – júgirýde eshqandaı shekteý joq ekenin kórsetý. Adam kez kelgen jerde júgire alady. Bul chellendj Almatyda 11 tamyz kúni bastalyp, 1 jeltoqsan kúni Nur – Sultan qalasynda aıaqtaldy. Bizben birge kásibı marafonshylar men áýesqoı sportshylar júgirdi. Eger adam aldyna maqsat qoıyp, soǵan durys daıyndalsa, bir emes, birneshe marafondy baǵyndyra alady. Biz sony kórsetip, dáleldegimiz keldi», - deıdi Vıktor Malchıkov.
Bul chelendj #DrýgoıTy jáne «Almaty marafony» jobasynyń qoldaýymen ótti. Sonymen qatar, Vıktor Malchıkov ár qalada júgirýshilermen kezdesip birneshe semınarlar ótkizdi.
«Árıne, mundaı júktemeler naqty daıyndyqty qajet etedi. Denege daıyndyqsyz kúsh salýǵa bolmaıdy. Meniń júgirýmen aınalysqanyma tórt jyl boldy. Kóktemde men fızıkalyq daıyndyqty kórsetetin sport synaǵynan óttim. Sodan keıin eki úlken startqa daıyndaldym - mamyrda jedel jarty marafonǵa jáne shildede Nur-Sultandaǵy Ironman 70.3-ke qatystym. Sondyqtan jattyǵýlar únemi júrgizilip otyrdy. Durys daıyndyqtan basqa qalpyna keltirý protsesi mańyzdy. Men úshin bul aptasyna 2 kún demalys, sporttyq massaj jáne aptasyna bir ret monshaǵa túsý jáne teńdestirilgen tamaqtaný»,- deıdi marafonshy.
Marafonshy Vıktor Malchıkovty elimizdiń barlyq qalasyndaǵy jergilikti júgirý komandalary qoldady.
Marafon chellendji Nur-Sultan qalasynda aıaqtaldy, oǵan 250-ge jýyq adam qatysty. Sonymen birge, elimizdiń barlyq óńirinde bir ýaqytta onlaın-jarys ótti.
