17 adamdy qutqaryp qalǵan ońtústikqazaqstandyqtyń erligi 7 jyldan keıin eskerildi
ShYMKENT. QazAqparat - Ońtústikqazaqstandyq órt sóndirýshi Dáýlet Baıqabylov janyp jatqan avtobýstan 17 adamdy qutqaryp qalǵan. Óz ómirin qaýip-qaterge tigip, jolaýshylardy aman alyp shyqqan tótenshe jaǵdaılar qyzmetkeri «Erligi úshin» tósbelgisin keýdesine taqty, dep habarlaıdy QazAqparat HAA tilshisi.
Qaıǵyly jaǵdaı osydan 7 jyl buryn Almaty-Tashkent tas jolynyń boıynda bolǵan edi. Sol kúni órt sóndirýshi tórt týysymen birge Almatyǵa saparlap bara jatqan. Jambyl oblysynyń aýmaǵynan óte beriste avtobýs pen aýyr júk kóligi qarama qarsy soqtyǵysyp qalady. Artynsha qoǵamdyq kólik otqa oranady. Osy kezde tótenshe jaǵdaılar qyzmetkeri qaýipke qaramaı, qyzyl jalynnyń ishinde qalyp qoıǵan adamdardy birtindep dalaǵa shyǵarady. Qutqarylǵan jolaýshylardy avtobýstan múmkindiginshe alys jerge aparyp, keıbirin jolshybaı ótken kólikterge mingizip jibergen. Jaraqattanǵandardyń aýrýhanaǵa jetýine qolǵabys etti. Alaıda óziniń úsh baýyry janyp jatqan avtobýstyń ishinde qalyp qoıady.
«Avarııa bolǵanda buryn ondaıdy kórmegen adamdar ózgelerdi qutqara almaıdy, tipti qaraı almaıdy. Al, endi men qolymnan kelgenshe qol ushymdy tıgizdim. Avtobýstyń aldy janyp jatqan soń, art jaǵyna kirip osynsha adamdy shyǵardym. Eń aqyrynda Nazergen qaryndasymdy alyp shyqtym. Úsh jaqynymdy sol jerden alyp shyǵa almaı qaldym. Eń ókinishim sol boldy»,-deıdi Dáýlet Baıqabylov.
Osylaısha beıbit kúnniń batyry atanǵan azamattyń erligi 7 jyldan keıin eskerildi. Marapat ıesi qazir Qazyǵurt aýdanynda turyp jatyr. Órt sóndirýshi qyzmetinen demalysqa shyǵyp, basqa salada eńbek etip júr.
