17-30 tamyz aralyǵynda QR Konstıtýtsııasy kúnine oraı áskerı sherýge daıyndyqqa baılanysty keıbir avıareısterdiń keshigýi múmkin -«Eır Astana» áýe kompanııasy
ALMATY. 17 tamyz. QazAqparat /Názıra Eleýhan/ - «Eır Astana» áýe kompanııasy tamyzdyń 17-30 aralyǵynda QR Konstıtýtsııasy kúnine oraı áskerı sherýge daıyndyqqa baılanysty keıbir reısterdiń keshigýi múmkin dep habarlaıdy.
Búgin Astana áýejaıyna jaqyn jerdegi áýe joldarynyń jabylýyna baılanysty Almaty - Astana baǵytynyń KC 851 reısi, Astana - Almaty baǵytynyń KC 852, Pavlodar - Astana baǵytynyń KC 316 jáne Óskemen - Astana baǵytynyń KC 346 reısteri ýaqytynan keshigip qondy.
Áýe joldarynyń jabylýy QR Konstıtýtsııasy kúnine arnalǵan sherýge daıyndyq aıasynda júrgizilgen áskerı jattyǵýlarǵa baılanysty bolǵan. Aldymen áýe dálizi saǵat 9.30-dan 12.00-ge deıin jabyq boldy. Odan keıin jabylý saǵat 13.00-ge deıin jalǵasty.
Almaty - Astana baǵytynyń KC 851 reısi saǵat 8.40 oryndalýy kerek bolatyn. Ushý aldymen saǵat 10.20-ǵa, sosyn 11.15-ke aýystyrylǵan. Al, Astana - Almaty baǵytynyń KC 852 reısi saǵat 11.25 ushýdyń ornyna saǵat 14.00-de ushady.
Pavlodar - Astana baǵytynyń KC 316 jáne Óskemen - Astana baǵytynyń KC 346 reısteriniń ýaqyty saǵat 11.30-ǵa aýystyryldy. Keste boıynsha KC 316 reısi saǵat 10.00-da, al, KC 346 reısi saǵat 10.30 oryndalýy kerek bolatyn.
«Áskerı jattyǵýlardyń 30 tamyzǵa deıin jalǵasýyna baılanysty basqa reısterdiń qansha ýaqytqa keshiktiriletinin boljaý qıyn. Sondyqtan, jolaýshylardan jańa aqparattardy áýe kompanııanyń www.airastana.com resmı saıtynan jáne myna telefondar: +7 727 244 44 77 arqyly bilip otyrýlaryńyzdy suraımyz»,-deıdi «Eır Astana» áýe kompanııasynyń baspasóz qyzmeti.
