17-19 mamyrda AEF aıasynda dárister festıvali ótedi - D. Joldaspaeva

ASTANA. QazAqparat - Búgin QR Úkimetiniń baspasóz ortalyǵynda «Qazaqstannyń ekonomıkalyq bastamalar qorynyń» dırektory, HІ Astana ekonomıkalyq forýmynyń uıymdastyrý komıtetiniń múshesi Dınara Joldaspaeva AEF aıasynda dárister festıvalin ótkizý týraly jáne jalpy forýmnyń jańa formaty jaıynda aıtyp berdi, dep habarlaıdy primeminister.kz.

Dınara Joldaspaevanyń aıtýynsha, 17-19 mamyr aralyǵynda Astana ekonomıkalyq forýmyn ótkizý kúnderi dárister festıvali ótedi. Shaqyrylǵan spıkeler: saıasatkerler, ekonomıster, ǵalymdar, bıznesmender, ǵalamdyq jobalardyń startapshylary, kıbernetıka, robotty tehnıka ınjenerleri - Astana JOO-laryna tikeleı tartylady.

Qazirgi tańda atalǵan dáristerdi Nazarbaev ýnıversıtetinde, Eýrazııa ulttyq ýnıversıtetinde jáne Qazaq memlekettik zań ýnıversıtetinde ótkizý múmkindikteri qaralyp jatyr.

Barlyq spıkerler týraly aqparat forum-astana.org saıtynda jarııalanǵan.

«Ózderiniń forýmǵa qatysatynyn rastaǵan spıkerler týraly aqparatty kún saıyn jańartyp otyramyz jáne olardyń árqaısysymen jeke keste quryp, árbir spıkerdiń AEF baǵdarlamasyna barynsha qatysýyn jáne úlken aýdıtorııa aldynda álem damýyna, sonyń ishinde Qazaqstannyń damýyna qatysty kózqarastarymen bólisý múmkindikterin qarastyramyz», - dep túsindirdi D. Joldaspaeva.

Budan ózge, AEF uıymdastyrý komıtetiniń múshesi bıyl dástúrli paneldik sessııalar zamanaýı formattarmen tolyqtyrylatynyn atap ótti.

«AEF baǵdarlamalyq dırektsııasy forýmnyń ǵalamdyq kún tártibin, halyqaralyq keń aýqymdy forýmdardyń tájirıbesin jáne daǵdysyn eskere otyryp, forým formatyn aıtarlyqtaı keńeıtti. Dástúrli paneldik pikirtalastar endigi debat, TED, dóńgelek ústelder jáne vızıonerlerdiń sóz sóıleýi sekildi jańa formattarmen tolyqtyryldy. Jyl saıyn AEF-tiń ótkizilýine kómektesetin jeke demeýshilerdiń osyndaı jańa format pen túrli spıkerlerdiń tizimine nazar aýdarmaı qalmaıtynyna senimdimin», - dedi D. Joldaspaeva.

Qarajattardyń basym bóligi jeke demeýshiler tarapynan tartylatynyn aıta ketý kerek, bul, uıymdastyrýshylardyń pikirinshe, AEF-ti sátti ótkizýdiń alǵysharty bolady.