169 sheteldik el aýmaǵynan shyǵaryldy - Almaty oblysy
TALDYQORǴAN. QazAqparat - Almaty oblysynyń polıtsııasy 169 sheteldiktiń qoldanystaǵy zańnama talaptaryn saqtamaǵanyn áshkerelep, el aýmaǵynan shyǵarǵan, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe,
2020 jyly oblysqa 29 myńnan astam sheteldik kelgen. Onyń eki júzge jýyǵy alys shetelden bolsa, basym bóligi jaqyn memleketterden.
«Kóshi-qon salasyndaǵy zań talaptaryn buzǵany úshin byltyr 7872 adam ákimshilik jaýapqa tartyldy. 169 adam elden shyǵarylsa, azamattyq sot óndirisi tártibinde 16 adam elimizden tysqary ketti. Qoldanystaǵy zańnamany óreskel buzý deregi boıynsha 6 qylmystyq is qozǵaldy. Bul 2019 jylmen salystyrǵanda úsh ese az»,- dedi oblystyq PD Kóshi-qon qyzmeti basqarmasy bastyǵynyń orynbasary polıtsııa polkovnıgi Elmurat Nurseıitov.
Vedomstvo ókiliniń aqparatyna sáıkes, zań talabyn buzǵandarǵa 80 mıllıon teńgege jýyq aıyppul salynyp, tolyǵymen óndirilgen. Kóshi-qon polıtsııasy alıment tóleýden jaltarǵan 364 adamnyń mekenjaıyn anyqtaǵan.
«2020 jyly 10876 adam elimizdiń azamattyǵyna qol jetkizdi. Onyń basym bóliginde tólqujat jeńildetilgen tártipte ázirlendi. Sonymen qatar, 710 adam Qazaqstan azamaty dep tanylsa, 480 ótinish berýshi azamattyǵy joq tulǵa kýáligin aldy. Ózge memleketterge turaqty turýǵa 750 adam qujattaryn rásimdedi»,- dep tolyqtyrdy polıtsııa polkovnıgi Elmurat Nurseıitov.
