168 mlrd teńgege qarjylyq buzýshylyqtar anyqtaldy - Erulan Jamaýbaev

NUR-SULTAN. QazAqparat – Búgin Úkimet otyrysynda QR Qarjy mınıstri Erulan Jamaýbaev qarjylyq baqylaýdyń nátıjesin baıandady, dep habarlaıdy QazAqparat tilshisi.

«Memlekettik aýdıtke toqtalsaq, ótken 7 aıda kameraldyq baqylaýmen somasy 7,5 trln teńgege 1 mıllıonnan asa memlekettik satyp alý rásimi qamtyldy. Tekserý qorytyndylary boıynsha somasy 647 mlrd teńgege talaptardy buzý eskertildi. 933 aýdıtorlyq is-shara ótkizildi.

Aýdıtpen 543 mlrd teńge bıýdjet qarajaty qamtyldy. Somasy 168 mlrd teńgege qarjylyq buzýshylyqtar anyqtaldy», - dedi mınıstr bıylǵy jeti aıdyń qorytyndysy boıynsha bıýdjettiń atqarylý jaıynda esep berý barysynda.

Onyń sózine qaraǵanda, taýarlar jetkizilimin qalpyna keltirý, qyzmetter kórsetý jáne jumystardy oryndaý, bıýdjetke óteý jáne esep boıynsha kórsetý jolymen 161,5 mlrd teńgege talapty buzý jaǵdaıy joıyldy.

«Aýdıt obektileri qyzmetin jetildirý jáne tıimdiligin arttyrý úshin 834 usynym berildi. Onyń ishinde 691-i atqaryldy», - dep túsindirdi E. Jamaýbaev.