167 jalǵan múgedektik anyqtaldy: Qazaqstanda áleýmettik kómek júıesi ózgeredi
ASTANA. KAZINFORM — Áleýmettik kómek tek muqtajdarǵa beriledi. Búgin Úkimet jańa júıege kóshýdi qarady. Qazaqstan Respýblıkasynyń Premer-mınıstri Oljas Bektenov keńes ótkizdi. Bul týraly Úkimettiń baspasóz qyzmeti málim etti.
Eńbek jáne halyqty áleýmettik qorǵaý mınıstri Asqarbek Ertaev azamattarǵa áleýmettik kómek pen jeńildikter kórsetý máselesi boıynsha baıandama jasady.
Vedomstvo málimetine sáıkes, birinshi kezeń «shyn máninde muqtaj azamattarǵa kómek kórsetilýi tıis» qaǵıdatyna negizdelgen jáne 36 tólemniń 14 túrin qamtıtyn memlekettik qoldaýdyń ataýly modeline kóshý úshin normatıvtik baza qalyptastyrýdy kózdeıdi.
Ekinshi kezeńde jergilikti atqarýshy organdar kórsetetin áleýmettik kómektiń 13 túri muqtajdyq deńgeıine qaraı 4 túrge biriktiriledi. 2027 jyldyń basynan bastap ardagerlerge muqtajdyq qaǵıdaty negizinde memlekettik qoldaýdy ataýly túrde kórsetý jónindegi usynystar aıtyldy. Sondaı-aq memleket tarapynan er adamdarǵa bala kútimine baılanysty demalys berilýiniń oryndy ekeni, bóbekjaılardaǵy oryn sanyn kóbeıtý jáne kishi jastaǵy balalarǵa arnalǵan kútýshiler tapshylyǵyn sheshý arqyly bala kútimi kezeńindegi áıelderge eki jyl ishinde kórsetiletin qoldaý formatyn jetildirý múmkindigi qaraldy.
Sonymen qatar múgedektigi bar adamdarǵa kómek kórsetý protsesine jasandy ıntellekt quraldaryn engizý nátıjeleri baıandaldy.
— Medıtsınalyq qujattardy qoldan jasaý arqyly múgedektik belgilengen 167 jaǵdaı anyqtalyp, tıisti faktiler quqyq qorǵaý organdaryna joldandy. Sondaı-aq ártúrli adamdardyń derekterinde birdeı málimetter kezdesetin 18 647 jaǵdaı anyqtalǵan, — dep habarlady Úkimetten.
Bul baǵyttaǵy jumys jalǵasady. Joǵaryda atalǵan reformalar «Otbasynyń tsıfrlyq kartasy» júıesiniń derekterine sáıkes ál-aýqat deńgeıi «A» — joǵary jáne «V» — qanaǵattanarlyq sanattaryna jatatyn memlekettik kómek alýshylardy qamtıdy.
Osy baǵytta ákimdikter «Otbasynyń tsıfrlyq kartasy» aqparattyq júıesi arqyly azamattarǵa saýalnama júrgizip jatyr.
Bıylǵy 1 qazannan bastap halyqqa áleýmettik tólemderdi taǵaıyndaý sharttaryndaǵy ózgerister týraly SMS, eGov Mobile jáne bankterdiń mobıldi qosymshalary arqyly kezeń-kezeńimen habar ıýerile bastaıdy. Barlyq usynys boıynsha zańnamalyq túzetýler ázirlenip, Quryltaıdyń qaraýyna engiziledi.
Premer-mınıstr Oljas Bektenov Eńbek mınıstrligine óńir ákimderimen birlesip, áleýmettik kómek pen járdemaqylardy ataýly túrde usynýdy qamtamasyz etý jumystaryn úılestirýdi tapsyrdy.
Aıta keteıik, Úkimet áleýmettik kómekke qatysty jańa júıeni qarady.
