167 myń qazaqstandyq júrgizýshi kýáligin onlaın aýystyrdy

ASTANA. QazAqparat - ІІM kórsetiletin qyzmetterdi qoljetimdi jáne ashyq etý maqsatynda olardyń keıbirin smartfondarǵa shyǵardy. Onlaın-qyzmetter iske qosylǵan sátten bastap olardy 7 mıllıonnan astam azamat paıdalandy, onyń ishinde 167 myń adam júrgizýshi kýáligin aýystyrǵan,-dep habarlaıdy Polisia.kz saıty.

Avtokólikti basqarýdyń mindetti sharttarynyń biri – jaramdy júrgizýshi kýáliginiń bolýy. Júrgizýshi kýáligi men tehpasportty alyp júrýdi mindettemeý maqsatynda ІІM olardy «tsıfrlandyrdy» jáne qujattardyń tsıfrlyq analogtaryn paıdalaný úshin zańnamany ózgertti. Bul qyzmet kórsetý merzimin orta eseppen 4-5 esege qysqartýǵa, qaǵazbastylyqtan aryltýǵa jáne HQKO-lardaǵy kezekterdi azaıtýǵa múmkindik berdi.

Sondaı-aq ІІM júrgizýshi kýálikteriniń qoldanylý merzimi ótýge jaqyndaǵan kezde olardy ýaqtyly aýystyrý qajettigi týraly eske salatyn SMS jáne push-habarlamalardy jiberý servısin engizdi.

Aıta ketý kerek, buryn jyl saıyn HQKO-ǵa qoldanylý merzimi ótip ketken júrgizýshi kýálikterin aýystyrý úshin 400 myńǵa jýyq azamat júginetin. Endi júrgizýshi kýáligin onlaın rejımde ekinshi deńgeıli bankterdiń mobıldi qosymshalary arqyly aýystyrýǵa bolady.

Júrgizýshi kýáligin jańartý úshin osyndaı qosymshalardyń birine kirip, bıometrııalyq tekserýden ótip, óz smartfonyńyzǵa sýretke túsý jetkilikti.

Ótinim ІІM derekqorynda óńdelgennen keıin jańa júrgizýshi kýáligi 10-15 mınýt ishinde avtomatty túrde shyǵarylady. Azamat HQKO-dan jańa qujatty ózine yńǵaıly kez kelgen ýaqytta ala alady, al avtokólikti smartfondaǵy «tsıfrlyq» júrgizýshi kýáligi nusqasy boıynsha birden basqara berýine bolady.

Mundaı qyzmetterdi engizý azamattarymyzdy memlekettik qyzmetterdi alý úshin qandaı da bir mekemelerge barý qajettiliginen bosatady.