160 mln-ǵa avto alý: ShQO ákimdigi qyzmettik kólikter ne úshin kerektigin túsindirdi

ÓSKEMEN. KAZINFORM – Shyǵys Qazaqstan oblysynda memlekettik organdarǵa qyzmettik kólik satyp alý týraly aqparat áleýmettik jelide qyzý talqylanyp jatyr. Jalpy somasy 160 mln teńge bolatyn bul satyp alýlarǵa qatysty oblys ákimdigi túsinikteme berdi.

Óńir ákimdigi málimetine súıensek, avtokólik satyp alý bıýdjet josparlaryna jáne avtoparkti jańartý qajettiligine sáıkes júrgizilip otyr. 

— Bul qarajat 2024 jyly bekitilgen. Keıbir jaǵdaılarda kólik satyp alý jańadan qurylǵan aýdandardy qajetti tehnıkamen qamtamasyz etý qajettiligimen baılanysty. Máselen, Óskemen qalasynda ákimdik úshin eki jańa kólik alynyp jatyr, sebebi qoldanystaǵy tehnıkanyń tozýy baıqalǵan. Qúrshim aýdanynda jumyspen qamtý jáne áleýmettik baǵdarlamalar bólimine jańa kólik satyp alyndy. Óıtkeni burynǵysy isten shyqqan. Jańadan qurylǵan Marqakól aýdanyna jeti kólikke qarjy bólinse, Katonqaraǵaı aýdanyndaǵy memlekettik arhıvke bir qyzmettik kólik alý josparlanǵan, — delingen aqparatta. 

Sonymen qatar satyp alýlar zań aıasynda júrgiziletini málim etildi. 

— Konkýrstar jarııalanyp, ekonomıkalyq turǵydan negizdelgen usynystar eskeriledi. Keıbir jaǵdaılarda jetkizýshilerdiń bolmaýyna baılanysty tenderler qaıta ótkizilgen. Bul qyzmettik kólikter shalǵaı aýdandardaǵy halyqpen jedel baılanys ornatý úshin qajet, — delingen habarlamada. 

Eske salsaq, buǵan deıin Óskemen qalasyndaǵy qoǵamdyq kólikterge jol aqysyn tóleýdiń jańa júıesin engizý sáýir aıyna shegerilgeni habarlanǵan.