16 jyl kúttim: Abaı qalasynda úı kezeginde turǵan 80 otbasy jańa páterdiń kiltin aldy
Bes qabatty úı «Qýatty óńirler – el damýynyń draıveri» ulttyq jobasy boıynsha salynǵan.
Ondaǵy páterler memleketten turǵyn úı alýǵa kezekte turǵan adamdarǵa arnalǵan.
«Halyqtyń áleýmettik osal toptary» sanatynan 9 kópbalaly otbasy, 16 balalar úıiniń túlekteri jáne 55 otbasy jańa qonystanýshylar atandy. Bul baspana jaldaý quqyǵymen berilgen.
Ár páterde elektr plıtalary men sý jylytqyshtar ornatylǵan.
Birinshi qabattardaǵy páterler erekshe qajettiligi bar adamdardyń turýyna beıimdelgen. Kirý toptary kótergishtermen jabdyqtalǵan.
Kiltterdi tapsyrý Qaraǵandy oblysynyń ákimi Ermaǵanbet Bólekpaevtyń qatysýymen ótti.
«Búginde kópbalaly otbasylar, múgedektigi bar adamdar jáne jetim balalar páter kiltin alyp jatyr. Biz turǵyndardyń osy sanattaryn qoljetimdi baspanamen qamtamasyz etýge tyrysamyz. Qýanyshty oqıǵamen shyn júrekten quttyqtaımyn, shańyraqtaryńyz balalardyń kúlkisine toly bolsyn, baqyt pen qýanyshqa bólenińizder!» – dep óńir basshysy jańa qonstanýshylardy quttyqtady.
Birinshi toptaǵy múgedek Tóleýtaı Bóstekbaev páterdi 11 jyl kútkenin aıtady.
«Mine, Astananyń mereıtoıynda páter kiltin aldym. Memleketke óte rızamyn», - deıdi ol.
Manarbek Balta «jetim balalar» sanaty boıynsha kezekte turyp, páter aldy.
«Páterdi 16 jyl kúttim. Úsh balam bar. Taý-ken sheberi bolyp jumys isteımin», – dedi Manarbek Balta.
Jalǵyzbasty ana Dárigúl Mádenıet balalarymen birge eki bólmeli páterde turady.
«Baspanamyzdy shamamen 12 jyl kúttik. Balalarymnyń qýanyshy qoınyna syımaı júr. Mundaı úılerdiń bizdiń qalada salynǵany óte jaqsy. Kórshilerdi qonys toıymen quttyqtaımyn. Bul úı bárimizge baqyt ákelsin!» – deıdi Dárigúl Mádenıet.
2021 jyly Abaıda osyndaı 80 páterli úı paıdalanýǵa berildi. Taǵy bireýi salynýda. Jańa úı nesıege beriledi.
Sonymen qatar, jyl saıyn kezekte turǵandar úshin qaıtalama turǵyn úı satyp alynady.
Bıyl segiz páter satyp alyndy, jyl sońyna deıin taǵy 12 páterdi satyp alý jáne berý josparlanǵan.
