16 jyl boıy qashyp júrgen qylmysker ustaldy
ASTANA. QazAqparat - Soltústik Qazaqstan oblysynyń quqyq qorǵaýshylary 2001 jyldan beri qashyp júrgen qylmyskerdi qolǵa túsirdi, dep habarlaıdy «QazAqparat» HAA tilshisi.
SQO ІІD baspasóz qyzmetiniń keltirgen málimetine sáıkes, Taıynsha aýdanynda 2001 jyly úılerdiń birine belgisiz bireýler basyp kirip, 3 mıllıon teńgeniń taýaryn qoldy etken. Tártip saqshylary sol tusta-aq shabýylǵa qatysqan alty adamdy birden tutqyndaǵanymen, fıgýrattardyń biri iz sýytyp ketken.
«2017 jyldyń jeltoqsan aıynda SQO ІІD Qylmystyq polıtsııa basqarmasynyń qyzmetkerleri Shymkent qalalyq ІІB-daǵy áriptesterimen birge jedel izdestirý jumystaryn júrgizdi. Birlesken shara barysynda izdeýde júrgen adam ustalyp, ýaqytsha oqshaýlaǵyshqa qamaldy», - dep habarlaıdy ІІD baspasóz qyzmetinen.
SQO ІІD Qylmystyq polıtsııa basqarmasynyń bastyǵy Petr Klımovtyń aıtýynsha, 2017 jyly oblys aýmaǵynda izdeýde júrgen 103 qylmyskerdiń 88-i ustalǵan. Qazirgi ýaqytta áli de 39 qylmysker izdestirilýde. Jedel izdestirý sharalary barysynda aýyr jáne asa aýyr qylmys jasaǵandar ustalyp jatyr.
