16 jyl kútken ádildik: sot pavlodarlyq jetim qyzdyń baspana quqyǵyn qorǵap qaldy
PAVLODAR. KAZINFORM — QR Joǵarǵy Soty pavlodarlyq jetim qyzdyń turǵyn úı quqyǵyn qalpyna keltirip, onyń 2008 jyldan bastap baspana alýǵa quqyǵyn tanýdy mindettedi.
Pavlodar oblysynyń turǵyny B. 2008 jyly ata-anasynyń qamqorlyǵynsyz qalǵan soń balalar úıine ornalastyrylǵan. Alaıda ony tek 2014 jyly «jetimder jáne ata-anasynyń qamqorlyǵynsyz qalǵan balalar» sanaty boıynsha memlekettik turǵyn úıge tirkegen.
2023 jyly ýákiletti organ B.-ny basqa eldi mekenge turaqty turýǵa ketkenine silteme jasap, ony kezek tiziminen shyǵarǵan. Sotqa deıingi is júrgizý barysynda talap qoıýshy 2008 jyldan, ıaǵnı balalar úıine túsken kúnnen bastap tirkeý quqyǵyn qalpyna keltirýdi surap, ótinish jazǵan. Birneshe ret shaǵymdanǵanyna qaramastan, B. tek bastapqy tirkeý kúninen bastap — 2014 jyldan ǵana kezek tizimine qaıta qoıylǵan.
Bul sheshimmen kelispegen talap qoıýshy 2008 jyldan turǵyn úıge tirkeý quqyǵyn taný týraly talap qoıýmen sotqa júgingen. Sot qorǵanshylyq fýnktsııalaryn júzege asyratyn organdar men uıymdardyń mindetterin tıisinshe oryndamaýyna baılanysty B.-nyń kezek tizimine ýaqtyly engizilmegenin anyqtady.
— Talap qoıýshynyń kesh tirkelgenine onyń eshqandaı kinási joq. Kámeletke tolmaǵandyqtan, ol turǵyn úıge quqyǵyn óz betinshe júzege asyrý múmkindiginen aıyrylǵan. B. tárbıelengen balalar úıi qazirgi ýaqytta taratylǵan. Ýákiletti organ talap qoıýshynyń tárbıege ornalastyrylǵany týraly istiń mán-jaıyn zańdy baǵalaýǵa áser etýi múmkin dálelderdi usynbady, — dep habarlady QR Joǵarǵy Sotynan.
Sot sondaı-aq «Turǵyn úı qatynastary týraly» Zańnyń erejelerine sáıkes, zańmen belgilengen tártippen turǵyn úıge muqtaj dep tanylǵan jáne kezekke qoıylǵan jetim balalar men ata-anasynyń qamqorlyǵynsyz qalǵan balalar turǵyn úı alǵanǵa deıin kezek tiziminen shyǵarylýǵa jatpaıtynyn eskertti.
Osylaısha laýazymdy tulǵalardyń zańsyz áreketteri talap qoıýshynyń konstıtýtsııalyq quqyqtary men zańdy múddeleriniń buzylýyna ákep soqqan. Sot memlekettik organdardyń áreketsizdigin de, jeke laýazymdy tulǵalardyń áreketteriniń zańsyzdyǵyn da anyqtaǵandyqtan, B.-nyń balalar úıine túsken kúnnen bastap memlekettik turǵyn úı qorynan turǵyn úı alýǵa turǵyn úı quqyqtary qalpyna keltirildi. Sheshim zańdy kúshine endi.
Eske sala keteıik, Jambyl oblysynda jetim balalarǵa tólem, kıim-keshek jáne joldama berilmegen.
