16 jeltoqsanda elimizdegi qaı joldarda qozǵalys shekteldi

ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady.

Ulttyq kompanııanyń málimetinshe, 2025 jylǵy 14 jeltoqsannan bastap Aqmola oblysynda aýa raıynyń nasharlaýyna baılanysty respýblıkalyq mańyzy bar «KAZ02 Astana – Kókshetaý (aınalyp ótý joly) – Petropavl – RF shekarasy (Jańa Jol ótkizý pýnkti)» avtojolynyń 18-230-shaqyrymynda (Astana qalasy – Şýchınsk qalasynyń baqylaý-ótkizý pýnkti) avtokóliktiń barlyq túri úshin jyldamdyq shegi saǵatyna 80 shaqyrymnan 60 shaqyrymǵa deıin tómendetildi.

Tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde qys aıaqtalǵansha saqtalady.

Kóliktiń barlyq túri úshin jabyq joldar

Pavlodar oblysy

• «Astana – Shiderti – Pavlodar – Ýspenka – RF shekarasy» avtojolyndaǵy «Qalqaman» kólik aıryǵy ýchaskesi (Qalqaman kentine kireberis jáne Astana baǵytyna shyǵý).

Aqmola oblysy

• «Astana – Shiderti – Pavlodar – Ýspenka – RF shekarasy» avtojolynyń 16-200-shaqyrymy (Astana qalasy – Pavlodar oblysynyń shekarasy);
• osy avtojoldyń 200-254-shaqyrymy (Aqmola oblysynyń shekarasy – Shiderti kenti);
• «Jezqazǵan – Arqalyq – Petropavl» avtojolynyń 445-595-shaqyrymy (Derjavınsk qalasy – Soltústik Qazaqstan oblysynyń shekarasy).

Soltústik Qazaqstan oblysy

• «Jezqazǵan – Arqalyq – Petropavl» avtojolynyń 595-671-shaqyrymy (Aqmola oblysynyń shekarasy – Toqsan bı kenti).

Eske salaıyq, buǵan deıin sınoptıkter 16 jeltoqsan kúni Astanada jáne elimizdiń 17 oblysynyń turǵyndaryna aýa raıynyń buzylýyna baılanysty eskertý jasaǵan edi.