16 jeltoqsan kúni Almatyda kásipqoı boks keshi ótedi
Qanat Altaevtyń esimi boks jankúıerlerine jaqsy tanys. Qazirgi ýaqytta asa aýyr salmaqtaǵy kásipqoı boksshy Ulybrıtanııanyń «MTK Global Kazakhstan» kompanııasynyń fılıalynda jattyqtyrýshy bolyp jumys isteıdi.
«MTK Global Kazakhstan» menedjerlik kompanııasy bıyl ǵana quryldy. Soǵan qaramastan biz qysqa ǵana merzimde biraz sharýa tyndyrdyq. Búgingi kúni bizdiń kompanııada 12 boksshy bar. Atap aıtsaq, Janqosh Turarov, Vıktor Kotochıgov, Alı Baloev, Abaı Tólesh, Elshat Nyǵmetolla, Abylqaıyr Sheǵalıev, Raı Seıitjanov, Eskendir Harsan, Nurtas Ájbenov, Nurdos Tólebaı, Mırasáli Sársenov. Taǵy bir jerlesimiz Sultan Zaýrbek Ulybrıtanııada oqý kýrsynan ótip jatyr, ol «MTK Global» kompanııasymen kelisimshartqa otyrdy. Sport jankúıerlerine bul kompanııa týraly túsindirýdiń qajeti joq dep sanaımyn, óıtkeni onyń quramynda 250-den astam boksshy bar, olardyń ishinde Taıson Fıýrı, Djo Saýnders jáne basqalary bar», - deıdi jattyqtyrýshy.
Qanat Altaev kásipqoı boks keshinde judyryqtasýǵa shyǵatyn barlyq boksshylardyń erekshe daıyndalyp jatqanyn atap ótti.
«16 jeltoqsan - qazaqstandyqtar úshin aıtýly jáne tarıhı kún. Bul - memlekettik mereke Táýelsizdik kúni. Osyndaı aıtýly kúnde Qazaqstannyń týy astynda óner kórsetý - biz úshin úlken mártebe. Jigitter óz sheberligin barynsha kórsetýge tyrysady. Mıllıondaǵan otandastarymyzdyń úmitin aqtaýǵa baryn salady. Jaqyn kúnderi jigitter qarsylasynyń atyn biletin bolady », - dedi Qanat Altaev.
Jarystyń ózine kelsek, boks keshinde 12 kezdesý ótedi. Basty jekpe-jekte qazaqstandyq Vıktor Kotochıgov WBC International nusqasynyń jeńil salmaqtaǵy altyn belbeýin sarapqa salady. 26 jastaǵy Taraz qalasy týmasynyń kásipqoı rıngte judyryqtasyp júrgenine tórt jylǵa jýyqtap qaldy. Sol aralyqta 10 kezdesý ótkizgen Kotochıgov barlyǵyn jeńispen aıaqtady. Tórt qarsylasyn aıqyn basymdyqpen utty. Aıqasty tek Qazaqstanda ǵana emes, Qytaı, Grýzııa, Germanııa, Ulybrıtanııa jáne Reseıde de ótkizip, kórermenniń ystyq yqylasyna bólendi.
Aıta keteıik, 16 jeltoqsanda rıngke Qazaqstan, Ońtústik Afrıka Respýblıkasy, Nıgerııa, Fılıppın, Taıland, Grýzııa, Ázirbaıjan, Reseı Federatsııasy jáne Ózbekstannan kelgen tanymal boksshylar shyǵady. Sondaı-aq, boks keshine Ózbekstannyń jarqyn juldyzy Fazlıddın Gaıbnazarov arnaıy keledi.