16 jasar qazaqstandyq sportshy karateden álem chempıony atandy
ASTANA. KAZINFORM — Jasóspirimder arasyndaǵy karateden álem chempıonatynda otandasymyz Arýjan Shákeı el qorjynyna altyn saldy. Japonııada ótken dúbirli dodadan júldeli oralǵan sportshy «Búgin LIVE» stýdııasynda suhbat berdi.
— Álemdik chempıonatqa ekinshi ret qatysyp otyrmyn. Alǵash ret 2023 jyly Almatyda ótken jarysta baq synaǵan edim. Bul joly Tokıoǵa bardym. Jarys jaqsy ótti. Álemdik doda bolǵan soń, árıne, ońaı bolǵan joq. Men Reseı men Japonııanyń qatysýshylarymen shyqtym. Fınalda reseılik qyzben básekege túskende kishkene qıynyraq boldy, — deıdi stýdııa qonaǵy.
Arýjan jeńiske jetkennen keıingi áserin bólisti.
— Jeńgen sátte emotsııamdy ustaı almaı, jylap jiberdim. Sodan keıin qýanyshymdy asa qatty bildire almaı qaldym. Tipti sóıleı almadym. Ata-anam da qatty qýandy. Týǵan-týystarym da rıza bolyp, kózderine qýanyshtan jas aldy. Meniń jaqyndarymnyń bári meni jeńedi dep oılady. Biraq ol kúni men ózime senbedim. Kishkene kúdigim boldy. Solaı jarysqa tilegimdi aıtyp shyqqanmyn. Ata-anamnyń qoldaýynyń arqasynda jeńip keldim, — deıdi sportshy.
Al jas karateshiniń jattyqtyrýshysy bul jeńiske jetýi úshin Arýjannyń tynbaı daıyndalǵanyn aıtady.
— Jalpy álemdik jarysqa barý úshin aldymen Qazaqstan chempıonaty bolady. Sol irikteýden kim birinshi oryn alsa, sol barady. Sol birinshi nómirli sportshylardyń ishine Arýjan da kirdi. Oǵan deıin 2 oqý-jattyǵý jıynynan ótti. Al Japonııaǵa bararda daıyndyǵymyzdy údetip otyrdyq. Álemdik doda 2 jylda 1 keledi. 2023 jyly Qazaqstanda ótken álem chempıonatynda 14-15 jasta 3-oryn alǵan edik. Sodan keıin 16-17 jas aralyǵyndaǵy sportshylardyń jarysyna jaqsylap daıyndaldyq. Arýjan 16-ǵa tolǵandyqtan, 17 jasar ózinen úlken qyzdarmen shyǵady. 65+ salmaq bolǵandyqtan, ol jerde qarsylastarynyń bári de myqty bolady, — deıdi Abdýlla Saıahat.
Aıta keteıik, Tokıo Olımpıadasynyń qola júldegeri, Dúnıejúzilik oıyndar, Azııa oıyndary men sary qurlyq chempıonatynyń jeńimpazy Sofıa Berýltseva Kaırdegi karateden álem birinshiliginiń kúmis júldesin jeńip aldy.