16 jastaǵy Zańǵar Nurlanuly álemniń 1-raketkasymen birge jattyqty

ASTANA. KAZINFORM – Qazaqstandyq tennısshi, 16 jastaǵy Zańǵar Nurlanuly Aýstralııanyń Melbýrn qalasynda álemniń 1-raketkasy, Italııa juldyzy ıAnnık Sınnermen birge jattyqty.

Qazirgi kezde jasóspirimder arasynda ITF reıtıngisinde 40-orynda turǵan Zańǵar Nurlanuly ıA.Sınnerdiń aýstralııalyq Aleks de Mınormen shırek fınaldaǵy oıynyna daıyndalýyna járdemdesti.

Bıyl jasóspirimder arasynda Aýstralııa ashyq chempıonatyna qatysqan Zańǵar jekeleı synda ekinshi aınalymǵa deıin jetti. 

Sonymen qatar úndistandyq Krısh Tıadjımen birge juptyq synda óner kórsetip, onda da bir oıynyn jeńispen aıaqtady. 

Bul Zańǵar Nurlanulynyń «Úlken dýlyǵa» týrnırine alǵash ret qatysýy edi. 

Eske sala keteıik, budan buryn Aýstralııa ashyq chempıonatynda Zańǵar Nurlanulynyń juptyq syndaǵy kezdesýin sátti ótkizgenin jazǵan bolatynbyz.

Sondaı-aq Ámir Omarhanov shırek fınalǵa sál jetpeı toqtady.