16 jastaǵy shymkenttik esirtki jarnamalaǵany úshin alty jylǵa sottalýy múmkin

ShYMKENT. KAZINFORM - Jas jigitti Eńbekshi aýdany polıtsııa basqarmasynyń jedel ýákilderi qylmys ústinde ustady.

Kámelet jasqa tolmaǵan kúdikti zańǵa qaıshy «jumysty» ınternetten tapqany jáne maýsym aıynan beri megapolıs aýmaǵynda esirtki zattaryn jarnamalaýmen aınalysqany anyqtaldy.

Kúdikti jigitten ózi daıyndaǵan jarnamalyq jazýlary bar paraqshalar tárkilendi.

«Polıtsııamen esirtkini nasıhattaý jáne zańsyz jarnamalaý jaıty boıynsha qylmystyq is tirkeldi. Qazirgi tańda tergeý áreketteri júrgizilýde. Kúdikti qamaýda. Zańnamaǵa sáıkes, atalǵan qylmys úshin alty jylǵa deıin bas bostandyǵynan aıyrý jazasy kózdelgen», - delingen Shymkent qalasy polıtsııa departamentiniń baspasóz qyzmeti taratqan aqparatta.

Bıyl zańsyz aınalymnan 19 tonnadan astam ártúrli esirtki zattary alyndy.