16 jastaǵy polıglot — Til úırenýge kúnine 30 mınýt jetkilikti

ASTANA. KAZINFORM — Qazaqstandyq 16 jasar mektep oqýshysy Bahtııar Sádibekov búginde 7 tildi erkin meńgerip, Oman Sultandyǵynyń elshisine aýdarmashylyq qyzmet kórsetip júr. Dıplomatııalyq ortada moıyndalyp úlgergen jas polıglot til úırenýdiń qupııalary men bolashaq josparlary týraly Jibek Joly telearnasynyń Bugin LIVE baǵdarlamasynda baıandap berdi.

Bahtııardyń til úırenýge degen qushtarlyǵy osydan eki jyl buryn Egıpetke jasaǵan otbasylyq saparynan bastalǵan. Sol kezde shet tilin bilmeýdiń qıyndyǵyn sezingen ol, elge oralǵan soń arab tilin meńgerýge bel býǵan. Nebári bir jyl ishinde arab tilinen S1 deńgeıine deıin kóterilip, resmı sertıfıkat alǵan.

— Egıpette júrgende qazaq jáne orys tilderimen ǵana shektelýge bolmaıtynyn, kommýnıkatsııanyń adam ómirindegi mańyzyn túsindim. Elge kelgen soń arab tilin meshitte, keıin jeke muǵalimmen oqyp, Eýrazııa ulttyq ýnıversıtetiniń arab tildi stýdentterimen tájirıbe almastym. Qazir arab, aǵylshyn, túrik, frantsýz, ıspan tilderin meńgerdim, orys tili bile júrgem, al qazaq tili — ana tilim, — deıdi Bahtııar Sádibekov.

Jas polıglottyń aıtýynsha, aýdarma isi, ásirese saıası deńgeıdegi kezdesýler úlken jaýapkershilikti talap etedi. Ol Dıplomatııa mektebine ambassador retinde qabyldanyp, Iran elshiligindegi sharada ózin kórsetkennen keıin, Oman elshiliginen resmı usynys alǵan.

— Aýdarma isi ońaı emes, eki el arasyndaǵy saıası jaǵdaıdy dál ári tez jetkizý kerek. Arab tili bolsa álemdegi eń baı til, onyń 12 mıllıon sózi bar. «Bir sózdi bilmeı qalsam ne bolady?» degen qorqynysh pen qobaljý bolady, biraq tájirıbemde ondaı jaǵdaı bolmapty. Til úırengisi keletin jastarǵa kúndelikti 10 mınýt aýdıo tyńdaýǵa, 10 mınýt jazýǵa jáne 10 mınýt oqýǵa ýaqyt bólse, kez kelgen tildi baǵyndyrýǵa bolady der edim, — dep keńes berdi jas maman.

Aıta keteıik, buǵan deıin, Skills Enbek platformasynda aýdarmashylardyń biliktiligin arttyrý úshin kýrstar katalogy keńeıtilgenin habarlaǵan edik.