16 jastaǵy qyzdy óltirip, denesin kanalǵa laqtyrǵan qyzylordalyq sottaldy
QYZYLORDA. KAZINFORM — Qyzylorda oblysynyń qylmystyq ister jónindegi mamandandyrylǵan aýdanaralyq soty kámeletke tolmaǵan qyz balany óltirip, denesin kanalǵa laqtyryp jibergen adamǵa jaza kesti.
Oqıǵa maýsym aıynda Shıeli aýdanynda bolǵan. 16 jasqa tolmaǵan Balsulý Ómirzaq 2 maýsym kúni keshke úıinen shyǵyp ketip, qaıta oralmaǵan. Qyzdyń denesi bir kúnnen keıin Jaqaev kanalynan tabylǵan. Polıtsııa jaǵa ustatarlyq qylmysqa kúdikti retinde jergilikti turǵyndy qamaýǵa aldy.
Tergeý barysynda onyń kinási tolyq dáleldendi. Aıyptalýshy sot otyrysynda qylmysyn moıyndap, jábirlenýshilerden keshirim surady.
Sot qylmystyq isti QR Qylmystyq Kodeksiniń 99-baby 2-bóliginiń 14-tarmaǵy, ıaǵnı kórineý kámeletke tolmaǵan adamdy óltirý deregi boıynsha qarady.
— Qylmys sottalýshynyń kinásin moıyndaýymen, jábirlenýshilerdiń, kýálardyń jaýaptarymen, saraptama qorytyndylarymen, beınetaspa, qylmystyq is qujattarymen jáne zattaı dáleldemelermen dálelin tapqan. Prokýror sottalýshyǵa 20 jyl merzimge bas bostandyǵynan aıyrý jazasyn taǵaıyndaýdy surady. Sottalýshyǵa 20 jyl merzimge bas bostandyǵynan aıyrý jazasy taǵaıyndaldy. Jazasyn qaýipsizdigi ortasha mekemede óteý belgilendi, — delingen habarlamada.
Sondaı-aq 10 mln teńge moraldyq shyǵyn óndirý mindeti júkteldi. Úkim zańdy kúshine engen joq.
Eske salaıyq, buǵan deıin qylmysty ashý jáne kúdiktini ustaý maqsatynda tájirıbeli qyzmetkerlerden jedel tergeý toby jumys istegenin jazǵanbyz.
