16 jastaǵy Ámir Omarhanov álemniń 7-raketkasymen jattyǵý ótkizdi

ASTANA. KAZINFORM — Qazaqstandyq tennısshi, 16 jastaǵy Ámir Omarhanov Serbııadaǵy ıAnko Tıpsarevıch tennıs akademııasynda Aýstralııa quramasynyń kóshbasshysy Aleks de Mınormen birge jattyqty.

Aleks óziniń sporttyq jolynda ATP týrnırlerinde 10 ret jeńimpaz atansa, sonyń toǵyzynda jekeleı synda úzdik shyqqan.

Ámir Omarhanov — Qaraǵandy tennıs mektebiniń túlegi, onda Petr Nesterovtiń basshylyǵymen jattyqqan. Qazirgi kezde Ámir Belgradta ıAnko Tıpsarevıch akademııasynda Nemanıa Lalıchtiń qolastynda sheberligin ushtap júr.

Jasóspirimder arasynda álemdik reıtıngide 14-orynda turǵan Ámir búginde AQSh-ta 19-24 tamyzda hard tósenishinde ótetin ITF Juniors J300 College Park jarysyna daıyndalýda. Sodan keıin jasóspirimder arasynda AQSh ashyq chempıonatynda óner kórsetedi.

Eske sala keteıik, budan buryn qos qazaqstandyq jasóspirim tennısshiniń Japonııada ótetin irikteýge joldama alǵanyn jazǵan bolatynbyz.