16 jasqa tolmaǵandar onlaın platformalarǵa tirkelý múmkindiginen aıyrylýy múmkin

ASTANA. KAZINFORM — Ázirlengen zań jobasy aıasynda 16 jasqa tolmaǵan balalarǵa onlaın platformalarǵa tirkelýge tyıym salynbaq. Bul turǵyda qandaı resýrstar qamtylýy múmkin? Bul suraqqa Mádenıet jáne aqparat mınıstrligi jaýap berdi.

— Qoldanystaǵy zańnamaǵa engiziletin túzetýler paketi jaqynda ǵana qoǵamdyq talqylaýǵa usynyldy. Mınıstrlikke ata-analardan, muǵalimderden jáne qoǵamdyq uıymdardan kóptegen ótinish kelip tústi. Olardyń ýájin eskere otyryp, biz halyqaralyq úrdisterdi taldap, sarapshylarmen keńestik. Nátıjesinde, 16 jasqa tolmaǵan balalardy onlaın platformalarda tirkeýge tyıym salatyn erejeni engizý týraly sheshim qabyldandy. Tyıym messendjerlerge taralmaıdy, tek áleýmettik jelilerge qoldanylady. Tyıymnyń maqsaty — kámeletke tolmaǵandarǵa qosymsha qaýipsizdik kepildikterin berý jáne olardy teris mazmundaǵy kontentten qorǵaý, - delingen mınıstrliktiń Kazinform agenttigine bergen jaýabynda.

Osyndaı shekteýler álemniń birqatar elinde de bar. Qazaqstanda bul baǵyttaǵy qadamdardy egjeı-tegjeıli zertteý júrip jatyr.

— Eger osy usynysty qoǵam qoldasa, onyń tásilderi memlekettik organdarmen talqylanady. Usynylǵan tásildiń biri — balanyń jasyn tekserý mindetterin onlaın platforma ıelerine júkteý. Aýstralııadaǵy jaǵdaıdy eskere otyryp, onlaın platformalar osyndaı tehnıkalyq jumystarǵa kirisip ketti, - dep atalyp ótken vedomstvo aqparatynda.

Eske salsaq, elimizde balalardyń áleýmettik jelige tirkelýin jasyna qaraı shekteý usynyldy. 

Jaqynda Eýroparlament 16 jasqa deıingi balalarǵa áleýmettik jelilerdi paıdalanýǵa tyıym salý jóninde rezolıýtsııany bekitti.