16 jasqa tolmaǵan balalarǵa skýter men elektrosamokat aıdaýǵa bolmaıdy - polıtsııa
PETROPAVL. QazAqparat – Soltústik Qazaqstan oblysynda polıtseıler kún jylyna joldarda paıda bolatyn eki dóńgelekti kólik ıelerine jol erejesin qatań saqtaý qajettigin eskertti. Polıtsııanyń málimetinshe, 16 jasqa tolmaǵan balalardyń skýter jáne elektrosamokat tizgindeýine ruqsat joq, dep habarlaıdy QazAqparat tilshisi.
«Ata-analar jol shetimen velosıped minip júrýge 14 jastan bastap qana ruqsat etilgenin bilýi tıis. Qozǵaltqysh kólemi 50 tekshe metrden kóp emes skýterdi jáne olarǵa teńestirilgen elektrsamokattardy 16 jastan basqarýǵa bolady. Júrgizýshi kýáligi bolýy mindetti emes. Dese de, jas júrgizýshiler Jol júrisi qaǵıdalaryn bilýi qajet. Patrýldik polıtsııa bólinisteri oblys ortalyǵynyń jáne eldi mekenderdiń joldarynda qozǵalys qaýipsizdigin nyǵaıtý jumystaryn júrgizip jatyr. Jol qozǵalysynyń barlyq qatysýshylarynan Jol júrisi qaǵıdalaryn qatań saqtaýdy suraımyz», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
SQO polıtsııa departamenti baspasóz qyzmetiniń málimetinshe, mototsıklshiler arasynda belgilengen jyldamdyqty asyrý, manevr jasaý qaǵıdalaryn buzý jıi kezdesedi.
Buny tájirıbe kórsetip otyr. Kez kelgen osyndaı quqyq buzýshylyq jol-kólik apatyna ákelip soǵýy múmkin.
Eki dóńgelekti kóliktiń júrgizýshileri manevr jasaǵanda, burylǵanda, basqa jolaqqa aýysqanda jol qozǵalysynyń basqa qatysýshylary úshin kórinetin belgilerdi kórsetýi tıis.
Al ereje buzǵandarǵa zańnamamen aıyppul qarastyrylǵan. Júrgizýshi de, jolaýshysy da shlem kııýi tıis.
Jaz kezinde paıda bolatyn taǵy bir problema – túngi motojarystarǵa qumar júrgizýshilerdiń tynyshtyqty buzýy.
Jumys kúnderi saǵat 22.00-den keıin, al demalys jáne mereke kúnderi saǵat 23.00-den keıin tynyshtyqty buzýǵa bolmaıdy. Zańdy buzǵandarǵa 5 AEK aıyppul salynady.
