16 jasqa deıingi balalardyń áleýmettik jelige kirýin shekteý tetigi ázirlenip jatyr
ASTANA. KAZINFORM — Qazaqstanda 16 jasqa deıingi balalardyń áleýmettik jelilerge kirýin shekteý tetigi pysyqtalady. Bul týraly Astana Media Week 2026 forýmynda Mádenıet jáne aqparat mınıstriniń birinshi orynbasary Qanat Ysqaqov málimdedi.
Onyń aıtýynsha, mınıstrlik bul baǵytta tsıfrlyq platformalarmen birlesip jumys isteıdi. Negizgi mindetterdiń biri — áleýmettik jeli paıdalanýshylarynyń jeke basyn rastap, jasyn anyqtaýdyń tıimdi jolyn tabý. Bul rette basqa elderdiń tájirıbesi de eskeriledi.
— Eń basty másele — paıdalanýshynyń jeke basyn anyqtaý. Bul — óte kúrdeli jumys. Sondyqtan adamnyń jasyn anyqtaýdyń biryńǵaı algorıtmin ázirleý úshin tsıfrlyq platformalardaǵy áriptesterimizben birlesip jumys isteımiz, — dedi Qanat Ysqaqov.
Birinshi vıtse-mınıstr josparlanyp otyrǵan shekteý tek áleýmettik jelilerge qatysty bolatynyn naqtylady. Al WhatsApp pen Telegram sııaqty messendjerlerge qoljetimdilik saqtalady.
Sonymen qatar, ol balalardyń ınternettegi qaýipsizdigin qamtamasyz etýge ata-analardyń da atsalysýy mańyzdy ekenin atap ótti. Onyń sózinshe, balalardy qorǵaý sharalary olardyń bilim alýyna jáne paıdaly aqparatqa qol jetkizýine kedergi keltirmeýi kerek.
— Bul bastama tıimdi bolýy úshin kásibı qaýymdastyqpen jáne tsıfrlyq platformalarmen birlesip jumys isteımiz. Balalardyń bilim alýyna jáne ózge de mańyzdy aqparatqa qol jetkizýine shekteý qoımaýymyz kerek, — dedi ol.
Qanat Ysqaqov bastamanyń sala mamandary men tsıfrlyq platformalardyń qatysýymen kezeń-kezeńimen pysyqtalatynyn jetkizdi.
Buǵan deıin Qazaqstanda 16 jasqa deıingi balalardyń áleýmettik jelilerge tirkelýine shekteý qoıylýy múmkin ekenin habarlaǵan edik.
