16 jasqa deıin áleýmettik jelige tyıym, mindetti SIM-karta: Prezıdent bala saýlyǵyn qorǵaıtyn zań qabyldaýdy usyndy
ASTANA. KAZINFORM — Memleket basshysy Qasym-Jomart Toqaev 16 jasqa tolmaǵandardyń áleýmettik jelide tirkelýine tyıym salý týraly zań jobasyn Quryltaıda qaraýdy usynyp, balalarǵa arnalǵan SIM-kartalardy engizýdi tapsyrdy.
Óz sózinde Prezıdent áleýmettik jeliler, tsıfrlyq platformalar, jasandy ıntellekt pen agressıvti marketıng balalar dúnıetanymyna otbasy men mektepten kem áser etpeıtinin atap ótti.
— Óskeleń urpaqtyń psıhologııalyq saýlyǵy men emotsııalyq turaqtylyǵy, adamgershilik tárbıesi ulttyq qaýipsizdikke jáne eldiń ornyqty damýyna yqpal etetin mańyzdy faktorǵa aınaldy. Qazirgi jaǵdaı 2018 jyly qabyldaǵan «Balalardy densaýlyǵy men damýyna zardabyn tıgizetin aqparattan qorǵaý týraly» Zańdy qaıta qaraýdy jáne eleýli ózgerister engizýdi talap etedi, — dedi Qasym-Jomart Toqaev elordada respýblıkalyq Tamyz konferentsııasynda.
Bıyl maýsym aıynda Úkimet 16 jasqa tolmaǵan paıdalanýshylarǵa áleýmettik jelide tirkelýge tyıym salatyn zań jobasyn ázirlep, Parlament qaraýyna usynǵan edi.
— Quryltaıdyń birinshi sessııasynyń ashylýynda depýtattarǵa osy máseleni qarastyrýdy usynamyn. Kóptegen ozyq elder osy ispettes sharalar qabyldady. Bizge de balalardyń psıhologııalyq jaı-kúıine tóngen qaýiptiń saldarymen kúresýdi doǵaryp, aldyn alatyn kez keldi dep oılaımyn. Áıtpese bul qoǵamnyń turaqtylyǵyna keri áserin tıgizedi, — dedi Memleket basshysy.
Prezıdenttiń aıtýynsha, Úkimet balalardy qorǵaý maqsatynda kontentti súzgiden ótkizý sharalaryn qabyldaǵany jón.
— Belgili bir, meılinshe obektıvti sebepterge baılanysty jaýapkershilikti ata-analarǵa ǵana artyp qoıa almaımyz. Sondyqtan balalarǵa arnalǵan mindetti SIM-kartalardy engizý tájirıbesin jappaı taratýdy tapsyramyn. Bul olardyń aqparattyq ımmýnıtetin qamtamasyz ete alady, — dedi Qasym-Jomart Toqaev.
Buǵan deıin Prezıdent Astanada Qazaqstan-Qytaı jasandy ıntellekt mektebin ashýdy usynǵan edi.
«Ulttyq qor — balalarǵa» jobasy arqyly 7 mln balanyń esepshotyna aqsha túsken.
Buǵan deıin Memleket basshysy mektepterge JI engizý tapsyrmasy tıisti deńgeıde oryndalmaǵanyn synaǵan edi.
Prezıdent balalar men pedagogterdiń JI-di durys ári júıeli qoldaný tártibin belgileıtin pármendi sharalardy shuǵyl qabyldaýdy tapsyrdy.
Sondaı-aq Prezıdent áleýmettik jelide bilim berý salasyna qatysty negizsiz daý-damaı men aıqaı-shýdyń kóbeıgenin synǵa aldy.
