16 jasynda júkti bolǵan: Aqtóbe polıtsııasy nege is qozǵamady
AQTÓBE. KAZINFORM — Qyz qazir anasymen birge turady. Polıtsııa birqatar tekserýden soń protsessýaldyq sheshim qabyldaýǵa negiz joq dep tapqan.
Áleýmettik jelide aýrýhanada em alǵan 17 jastaǵy aqtóbeliktiń kómek suraǵany týraly jazyldy. Jasóspirim shaǵynda seksýaldyq zorlyqqa ushyrap, ol kúni búginge deıin jalǵasyp jatqanyn jetkizip, kómek suraǵan. Júktilikti úzip, otadan keıin ońalý úshin dári ala almaǵanyn, sol úshin de kómekke muqtaj ekenin beınebaılanys kezinde aıtqan. Osy oqıǵadan keıin polıtsııa istiń mán-jaıyn túsindirdi.
— Polıtsııa atalǵan derek boıynsha tekseris júrgizdi. 2024 jyly medıtsınalyq tekserý kezinde kámeletke tolmaǵan qyzdyń júkti ekeni anyqtalǵan. Anasy men qyzy quqyq qorǵaý organdaryna aryz berýden bas tartqan. Sonymen qatar osy oqıǵaǵa qatysy bar barlyq tulǵamen polıtsııa qyzmetkerleri sóılesti. Anyqtalǵandaı jasóspirimder arasyndaǵy jynystyq qatynas ózara kelisimmen bolǵan. Anasy men qyzynyń sózine súıensek, qyzdyń 12–13 jasynda jynystyq zorlyq-zombylyqqa ushyraǵany týraly aqparat rastalǵan joq. Júrgizilgen is-sharalardyń nátıjesinde protsessýaldyq sheshim qabyldaýǵa negiz anyqtalmady, — dedi Aqtóbe oblystyq PD baspasóz qyzmeti.
Aqtóbe oblystyq densaýlyq saqtaý basqarmasy bolsa, qazir qyz ýchaskelik dárigerdiń baqylaýynda ekenin aıtty.
— 2024 jyly medıtsınalyq kómekke júginip, anasynyń kelisimimen áleýmettik kórsetkishter boıynsha júktilik úzildi, kontratseptsııamen qamtamasyz etilgen. Bir júktilik bolǵan. Densaýlyq jaǵdaıyna qatysty qalǵan málimetter QR «Halyq densaýlyǵy jáne densaýlyq saqtaý júıesi týraly» Kodeksiniń 273-babyna sáıkes qupııa sanalady, — dep habarlady.
Aqtóbe oblystyq bala quqyqtaryn qorǵaý jónindegi ýákil Aıgúl Nurkeeva otbasyna baryp, kezdesti. Janyna ýchaskelik polıtsııa qyzmetkerin, qorǵanshylyq jáne qamqorshylyq organdarynyń, sondaı-aq kámeletke tolmaǵandar isi jónindegi komıssııanyń ókilderin ertip bardy. Buǵan deıin bul otbasy kómek suramaǵan.
— Turmys jaǵdaıymen tanystym, qazirgi ýaqytta memlekettik organdarmen birlese jumys júrgizip jatyrmyz. Anyqtalǵandaı, anasy ata-ana quqyǵynan aıyrylmaǵan jáne shektelmegen. Jaǵdaı — baqylaýymda, — dedi ol.
Eske salsaq, buǵan deıin Aqtóbe oblysy Oıyl aýdanynda oqýshy qyz bosanǵannan keıin qylmystyq is qozǵaldy. Aqtóbe oblysynyń ákimi Ashat Shaharov 14 jastaǵy ananyń taǵdyryna kim jaýapty ekenin anyqtaýdy tapsyrdy.