16 jasar jasóspirim Jaıyqqa batyp bara jatqan balany qutqardy
Oblystyq polıtsııa departamentiniń baspasóz qyzmetinen málim etkendeı, oqıǵa 2 qyrkúıekte, saǵat 18:00 shamasynda bolǵan.
«Atyraý qalasyndaǵy dene shynyqtyrý-sport kesheniniń tusynda Jaıyq ózenine batyp bara jatqan balasyn ákesi qutqarmaq bolǵan. Osy kezde shaǵyn qaıyqpen ótip bara jatqan 16 jastaǵy Evgenıı Rýsakov jedel kómekke umtylǵan. Statsıonarlyq bekette kezekshilik atqaryp júrgen patrýldik polıtsııa batalonynyń qyzmetkerleri, polıtsııa leıtenanty Aqjol Qıbatollaev pen polıtsııa aǵa leıtenanty Berdibek Habıbýllaev ta kómekke keldi», - dep habarlady departamenttiń baspasóz qyzmetinen.
Keıin polıtseıler 30 jastaǵy er adam men onyń 2019 jyly týǵan ulyn Jaıyq ózeniniń jaǵalaýyna shyǵarýǵa kómektesip, jedel járdem shaqyrdy. Ákesi men balasyna alǵashqy medıtsınalyq kómek kórsetildi.
Polıtsııa usynǵan vıdeoǵa súıensek, otbasy katamaran jaldaǵan. Qazir ózende adam tasymaldaýdyń qaýipsizdigin qadaǵalamaǵan jaýapty tulǵalarǵa qatysty is-qujattary jınaqtalyp jatyr.
Buǵan deıin Atyraýda ákeli-balaly ekeý Jaıyq ózenine batyp ketkenin habarlaǵan bolatynbyz.
Oblystyq tótenshe jaǵdaılar departamenti qoǵammen baılanys tobynyń málimetinshe, ákesi men balasy Jaıyq ózeniniń sýǵa túsýge jabdyqtalmaǵan tusynda batyp ketkeni anyqtaldy. Ákesi 35-te, al, balasy 9 jasta bolǵan.
