16 jasar qazaqstandyq paradzıýdoshy Alfııa Tilekqabyl Azııa chempıonatynda top jardy

ASTANA. QazAqparat - Paradzıýdodan Azııa chempıonatynda Qazaqstan qorjynyna úshinshi altyn tústi. Ekinshi jarys kúninde 57 kelige deıingi salmaq dárejesinde qazaqstandyq Alfııa Tilekqabyl jeńimpaz atandy, dep habarlaıdy QazAqparat.

Qazaqstan paradzıýdo federatsııasynyńmálimetinshe, ol kózi múldem kórmeıtin sportshylar sanatynda (J1) beldesti.

Aınalmaly júıe boıynsha kúresken ol chempıondyq ataqqa deıin Dıloram Dıhanova (Qazaqstan) men Hosıothan Pozıljonovany (Ózbekstan) jeńdi.

Aıta keterligi, 16 jasar Alfııa úshin bul - alǵashqy Azııa chempıonaty. Ol paradzıýdodan Qazaqstan ulttyq quramasyna bıyl qosylǵan.

Paradzıýdodan Azııa birinshiligi Astana qalasynda Jaqsylyq Úshkempirov atyndaǵy jekpe-jek saraıynda ótip jatyr.

Alǵashqy jarys kúninde qazaqstandyq Daıana Fedosova (-57kg, J2) men Erǵalı Shameı (-73kg, J1) chempıon atansa, Aqmaral Naýatbek (-52 kg, J2) kúmis, Oljas Orazaly (-73 kg, J2) qola medal enshilegen bolatyn.

Parıj paralımpıadasy aldyndaǵy resmı chempıonatta sportshylar J1 (kózi múldem kórmeıtin) jáne J2 (kózi nashar kóretin sportshylar) sanaty boıynsha baq synaýda.

Qurlyqtyq doda 30 sáýirge deıin jalǵasady.