16 tonna talapqa saı emes taýar aınalymnan shyǵaryldy
ASTANA. KAZINFORM — 2026 jyldyń birinshi jartyjyldyǵyndaǵy baqylaý satyp alýynyń qorytyndysy boıynsha 17 myńnan astam ónim úlgisi zertteldi. Onyń ishinde azyq-túlik ónimderiniń 11 968 úlgisiniń 8,8%-y, al azyq-túlikke jatpaıtyn ónimderdiń 5 729 úlgisiniń 32,1%-y belgilengen talaptarǵa sáıkes kelmegen.
Sonymen qatar mıkrobıologııalyq kórsetkishter boıynsha (1,9%), fızıkalyq-hımııalyq kórsetkishter boıynsha (1,7%), toksıkologııalyq kórsetkishter boıynsha (1,5%), organoleptıkalyq kórsetkishter boıynsha (0,04%), fızıkalyq faktorlar boıynsha (0,2%) sáıkessizdikter anyqtaldy, sondaı-aq tutynýshylardy jańylystyrý faktileri tirkeldi (1,7%).
Tekserý nátıjeleri boıynsha bas memlekettik sanıtarııalyq dárigerler talaptarǵa sáıkes kelmeıtin ónimdi alyp qoıý jáne keri qaıtaryp alý týraly 716 qaýly shyǵardy. Saýda aınalymynan jalpy quny 11 mln teńgeden asatyn 16 tonna taýar alyndy. Jalpy somasy 19,2 mln teńgege ákimshilik aıyppuldar salyndy, 483 tergep-tekserý júrgizilip, 16 jospardan tys tekserý ótkizildi.
Komıtet tutynýshylarǵa ónimdi satyp alý kezinde tańbalanýyn muqııat zerdeleýdi usynady. Tańbalaý anyq, ońaı oqylatyn bolýy jáne memlekettik jáne orys tilderinde mynadaı aqparatty qamtýy tıis: ónimniń ataýy, daıyndalǵan kúni, saqtaý merzimi men sharttary, quramy, óndirýshi jáne shyǵarylǵan eli týraly málimetter. Sondaı-aq ónimniń Eýrazııalyq ekonomıkalyq odaqtyń tehnıkalyq reglamentteriniń talaptaryna sáıkestigin baǵalaý rásimderinen ótkenin rastaıtyn EAS belgisiniń bolýyna nazar aýdarý qajet.
Satyp alýshy satýshydan ónimniń sáıkestigin rastaıtyn qujattardy – sáıkestik týraly deklaratsııany, sáıkestik sertıfıkatyn nemese memlekettik tirkeý týraly kýálikti talap etýge quqyly. Qujattardyń túpnusqalyǵyn olarda kórsetilgen málimetterdi ónimniń tańbalanýyndaǵy aqparatpen (ataýy, óndirýshisi, artıkýly jáne basqa da sáıkestendirý belgileri) salystyrý arqyly tekserýge bolady.
Aıta ketelik tutynýshylardyń ótinishteri negizinde aýmaqtyq departamentter 776 tekserý júrgizdi. Tekserý nátıjesinde 892 ákimshilik is qozǵalyp, jalpy somasy 17,3 mln teńge kóleminde ákimshilik aıyppul salynǵan edi.
