16 shaqyrymǵa jaıylǵan qarǵyn sýda qaıyqpen adam, azyq-túlik tasydyq - qutqarýshy
AQTÓBE. KAZINFORM - Aqtóbe oblystyq tótenshe jaǵdaılar departamenti jedel qutqarý jasaǵynyń bas qutqarýshysy Saǵadat Berdiǵalıev úsh aıǵa jýyq ýaqyt birneshe aýdanda qutqarý, tasymaldaý qyzmetin atqardy.
Ol áriptesterimen birge qatynas úzilgen Jaısańbaı aýylynda tasymaldaý qyzmetine jaýapty boldy. Adammen qatar eki úıir jylqyny da aman alyp qaldy.
Saǵadat Berdiǵalıev búgin TJM Shyńǵys Árinovtiń qolynan «Erligi úshin» medelin aldy. Ol tasqynǵa qarsy kúres jumystaryna 27 naýryzdan bastap kiristi. Aldymen Qobda aýdanynyń ortalyǵyna bardy. Onda sý qorshaýynda qalǵan adamdardy, maldy arǵy betten bergi betke shyǵardy. Aýdan ortalyǵynda 2-3 kún aıaldap, keıin Jırenqopa aýyly baǵytyndaǵy birneshe eldi mekenge azyq-túlik, dári-dármek jetkizdi. Qajet kezde adamdardy tasydy. Sol aýylda 10 sáýirge deıin júrip, ony ózge áriptesteri almastyrdy. Aqtóbege kelgen soń olardy Yrǵyz aýdanyna jiberdi. Ol 14 sáýir kúni edi.
- Onda Nura, Mamyr, Belsher, Quılys aýyldarynyń halqyn evakýatsııalaýǵa qatystyq. Alǵashynda tikushaqqa kómektesip, keıin qaıyqpen júrdik. Nura aýylynda sýda turǵan úılerdi fotoǵa túsirdik, adamdardy tasymaldap, qalyp qoıǵan ıt-mysyqty shyǵardyq. Sodan bizdi Jaısańbaı aýylyna jiberdi. Onda eki aı boıy kólik qatynasy bolmaı, azyq-túlik, janar-jaǵarmaıdyń bári qaıyqpen tasymaldandy. Eki úıir jylqy aralda, sý ortasynda qalyp qoıǵan edi. Sol aralyqta shóptiń bárin jep qoıǵan. Taqyr aýmaqtan kelesi jaǵaǵa aıdap shyǵardyq. 70 bas jylqy, - dedi Aqtóbe oblystyq tótenshe jaǵdaılar departamenti jedel qutqarý jasaǵynyń bas qutqarýshysy Saǵadat Berdiǵalıev.
Sodan bul top tapjylmaı eki aı boıy qyzmet etti. Mindet - qaıyqpen tasymaldaý, qatynasty qamtamasyz etý.
- Eki qaıyqpen tasymaldadyq. Sý 16 shaqyrym boldy. Bir baryp kelgende 32 shaqyrym júremiz. Qaıyqpen bir baǵytqa 1 saǵat 30 mınýt qajet. Ári-beri qatynas 3-4 saǵatqa sozyldy. Bul Jaısańbaı aýyly men «Abzal» sharýa qojalyǵynyń arasy. Kólik Araldan, Yrǵyzdan kelip, sol jerge aıaldaıdy. Bizge janar-jaǵarmaı, gýmanıtarlyq kómek tasymaldaıdy. Al biz sýdan ótkizemiz. Bir qaıyqqa joq degende 5-6 adam otyrady. Bir ótkizgende eki qaıyqpen 12-13 adam ótkizemiz. Bir qaıyqqa 500 kelilik júk salamyz. Taza júk tıegende bir reıspen 800-900 keli júk tasymaldaımyz. Janar-jaǵarmaı bóget salǵan júk kólikterine qajet boldy. Eń kem degende 10 tonna jaǵarmaı, 20 tonnaǵa jýyq azyq-túlik tasymaldadyq. Eki aıda 500-600 adamdy ári-beri aparyp, jetkizdik,- dedi Saǵadat Berdiǵalıev.
Onyń aıtýynsha, tasqyn bastalǵan kezde adamdardyń bári qoryqqan. Tótenshe jaǵdaılar qyzmetkerin kórgen turǵyndar olarǵa úmitpen qarap, «mamansyń ǵoı, aman qalamyz ba» degen kúnderi boldy. Al olar kúndiz-túni jumys istep jatqanyn, sý deńgeıi qalypty ekenin, eger bóget jarylsa, qum toly qappen birden bekitip tastaıtynyn aıtty, halyqqa dem berdi.
- Ol jerde TJM-niń áskerı qyzmetkerleri de boldy. Barlyǵy 25 áskerı, 5 órt sóndirýshi boldy. Negizi adamdardy evakýatsııalaýǵa eki tikushaq bólingen. Jaǵdaı ol kúnge jetpedi. Al eki qaıyq toqtamaı jumys istedi. Tańda 5-te shyqqannan keshki saǵat 22:00-23:00-de toqtaımyz. Ózimiz tórt adam boldyq. Alma-kezek shyqtyq. Al áskerıler bógetti bekitti. Kómek asa qajet bolǵanda olardyń da qataryna qosyldyq. Eriktilerdi de tasymaldadyq. Áý basta Jedel qutqarý jasaǵanynan 4 adam bardy. Bir adam otbasy jaǵdaıyna baılanysty keri qaıtty. Úsh adam sońyna deıin júrdik. Biraq bizdi de aýystyrdy. Onda áli úsh adam júr,- dedi ol.
Saǵadat Berdiǵalıev - Oıyl aýdanynyń týmasy. Bastaýysh synypty sonda oqyp, keıin Aqtóbe qalasy M.Arynov atyndaǵy orta mektepke aýysty. 2004 jyly mektep bitirip, birden tótenshe jaǵdaılar qyzmetine jumysqa ornalasty. Bıyl osy salada júrgenine 20 jyl toldy. Negizgi mamandyǵy sýdan qutqarý qyzmeti bolǵanymen, qutqarý jumystarynyń bárin atqarady. Otbasyly, bes balanyń ákesi.
