16 saǵattyq eńbek: atyraýlyq sheber shashtan kúrdeli kompozıtsııa jasaıdy
ATYRAÝ.KAZINFORM — Bir shash úlgisin jasaýǵa 16 saǵat jumsaýǵa bolady. Atyraýlyq breıder Ksenııa Volodına úshin bul jaı ǵana shash órý emes, birneshe kún boıy oılastyrylǵan shyǵarmashylyq ıdeıany naqty obrazǵa aınaldyrý. Bala kezindegi hobbıin kásibine aınaldyrǵan sheber búginde halyqaralyq baıqaýlarǵa qatysyp, kúrdeli kompozıtsııalar jasap júr.
Ksenııa Volodına breıdıngpen, ıaǵnı shash órý ónerimen bala kezinen aınalysa bastaǵan. Alǵashqyda bul onyń hobbıi bolǵan. Keıin eki jyl boıy úı jaǵdaıynda tapsyrys qabyldap, ózdiginen tájirıbe jınaǵan.
— Alǵashqy jumysymdy ózimniń jáne qurbylarymnyń balalaryna jasadym. Árıne, ol kezde jasaǵan shash úlgileri qazirgi jumystarymnan áldeqaıda ózgeshe boldy, — deıdi sheber.
Ol shashtaraz-modeler mamandyǵyn meńgergen. Alaıda shash sániniń basqa baǵyttaryn da baıqap kórgenimen, óziniń negizgi baǵyty retinde breıdıngti tańdaǵan.
— Bárin baıqap kórdim, barlyǵyna oqydym. Biraq janym shash órýge jaqyn. Dál osy baǵyt arqyly odan da erekshe dúnıe jasaı alatynymdy túsindim, — dedi Ksenııa Volodına.
Sheberdiń aıtýynsha, kásibı deńgeıde oqýǵa 2022-2023 jyldary belsendi kirisken. Buǵan onyń qyzmetine qyzyǵýshylyq tanytyp, «oqytasyz ba?» dep jıi suraıtyn adamdardyń ótinishi sebep bolǵan. Ksenııa úshin halyqaralyq chempıonattar kásibı damýdyń mańyzdy kezeńine aınalǵan. Onyń aıtýynsha, baıqaýlarda kommertsııalyq jáne shyǵarmashylyq shash úlgileriniń aıyrmashylyǵy bar.
Máselen, kúndelikti tapsyrysqa arnalǵan shash úlgisin jasaýǵa shamamen 40 mınýttan bir saǵatqa deıin ýaqyt ketedi. Al chempıonattaǵy shyǵarmashylyq jumystar birneshe saǵatqa sozylady. Munda shashqa túrli órnek pen kúrdeli kompozıtsııa túsirilip, jumys baıqaýdyń taqyrybyna saı jasalady.
— Chempıonattar arqyly tez damýǵa bolady. Bul — ózińdi kásibı turǵyda kórsetýge múmkindik beretin úlken tramplın. Úsh jyldyń ishinde breıdıng áleminde tanymal boldym, — deıdi Ksenııa Volodına.
Sheberdiń erekshe ıdeıalary birden paıda bola bermeıdi. Keıbir obrazdardy birneshe jyl boıy oıynda saqtap júredi. Mýzyka tyńdap otyryp belgili bir beıneni elestetýi de múmkin. Al qazaqy oıý-órnekti shash úlgisine engizý ıdeıasy balalarǵa arnalǵan boıaıtyn kitap arqyly kelgen. Ksenııa qazaqtyń ulttyq naqyshtaryn beıneleıtin sýretterdi qarap, olardy shash arqyly qalaı kórsetýge bolatynyn oılastyrǵan.
Ol eń aldymenshyǵarmashylyq jumysty aldymen qaǵazǵa túsiredi. Keıin arnaıy manekenge jasap kóredi. Tek kompozıtsııa kóńilinen shyqqan soń ǵana modeldiń shashyna kóshedi. Sebebi adamnyń bas pishini, shash qurylymy jáne shashtyń ósý syzyǵy ártúrli bolǵandyqtan, daıyn jumysty modelge dál qaıtalaý ońaı emes.
Sheberdiń eń kúrdeli tájirıbeleriniń biri Sochıde ótken álem chempıonatymen baılanysty. Ol jerde jumystardy baıqaý kezinde tikeleı jasaý qajet bolǵan.
— Byltyr Sochı qalasynda Georgıı Kottyń atynan ótken álem chempıonatyndaǵy jumysym úlken tájirıbe boldy. Sebebi barlyq jumysty sol jerde oryndaý kerek edi. Túni boıy shash órep, tańerteń daıyn jumysty tanystyratynbyz. Ýaqyt óte shekteýli boldy. Onlaın chempıonattarda ózime yńǵaıly jaǵdaıda jumys istep, ony keıin asyqpaı sýretke túsiretinmin. Al Sochıde ár jumysty eki kún qatarynan shamamen 16 saǵattan órýge týra keldi. Úsh nomınatsııaǵa qatystym, onyń ekeýi modelderge jasalatyn shyǵarmashylyq, fantazııalyq baǵyttaǵy jumystar boldy. Jalpy sol kezeńde shamamen 45–50 saǵat qatarynan uıyqtamadym, — dedi Ksenııa Volodına.
Jumys birden oıdaǵydaı shyǵa bermeıdi. Sheberdiń aıtýynsha, shyǵarmashylyq jobalardy birneshe ret qaıta jasaýǵa týra keledi. Ksenııa Volodınanyń jumysy ONESHOT Hair Awards 2026 baıqaýynda Intricate Braids & Twists nomınatsııasynda úzdik bestikke endi. Bul nomınatsııada shash órý tehnıkasy, shyǵarmashylyq sheshim jáne jumystyń kórkemdik oryndalýy baǵalanady. Bul kompozıtsııa buǵan deıin TMD chempıonatynda birinshi oryn alǵan.
— Basynda tańqaldym. Atyraýdan shyqqan breıder retinde álemdegi úzdik bes sheberdiń qataryna kiremin dep oılamadym. Ásirese, jumysymdy adamdardyń ózderi baǵalap, daýys bergeni qatty áser etti. Men úshin tegimmen birge Qazaqstannyń atalýynan asqan maqtanysh joq, — dep tolyqtyrdy atyraýlyq sheber.
Onyń aıtýynsha, halyqaralyq baıqaýdaǵy nátıjeden keıin áleýmettik jelidegi aýdıtorııasy da artqan. Jumysyn Threads jelisinde jarııalaǵannan keıin ol keńinen taralǵan. Osydan keıin sheberge elimizdiń ár óńirinen oqýǵa qatysty usynystar men suraqtar túse bastaǵan.
Qazir Ksenııa Volodına onlaın oqytý kýrsyn daıyndaýdy josparlap otyr. Sonymen birge ol halyqaralyq deńgeıde jattyqtyrýshy mártebesin aldy.
Sheberdiń endigi maqsaty — sángerlermen jáne dızaınerlermen birlesip jumys isteý, ulttyq stıldegi obrazdar jasaý. Onyń bul armany jaqyn ýaqytta júzege asýy múmkin.
Ksenııa Volodına Qazaqstan quramasynyń breıdıng baǵyty boıynsha jattyqtyrýshysy retinde aldaǵy halyqaralyq is-sharaǵa qatysady. Onyń aıtýynsha, qarashaja Astanada shashtaraz óneri ındýstrııasyndaǵy halyqaralyq is-shara ótedi. Oǵan álemniń keminde 40 elinen ókilder kelip, Qazaqstan quramasy ulttyq stıldegi zamanaýı shoý uıymdastyrmaq. Atyraýlyq sheber osy jobada birneshe obraz jasaýdy josparlap otyr.
Buǵan deıin elimizde shash qııý qyzmetiniń aqysy bir-birinen alshaq ekenin jazǵan edik. Oǵan ásemdik salonynyń mártebesi, kásibı sheberdiń deńgeıi men shashtyń uzyndyǵy, qalyńdyǵy áser etedi.
