16 myń adam Qazaqstan azamattyǵyn alady - Qanat Saýdabaev
ASTANA. 22 jeltoqsan. QazAqparat /Rýslan Ǵabbasov/ - Búgin Aqordada QR Memlekettik hatshysy-Syrtqy ister mınıstri Qanat Saýdabaevtyń tóraǵalyǵymen ótken QR Prezıdenti janyndaǵy Azamattyq máseleler jónindegi komıssııanyń kezekti otyrysynda Qazaqstan azamattyǵyn alýǵa nıet bildirgen 16 myń ótinim bekitildi.
Q. Saýdabaev bıyl Azamattyq máseleler jónindegi komıssııanyń sońǵy otyrysy ótip jatqanyn aıta kele, «Jańa jyldyń qarsańynda álemniń ár elinen Qazaqstan azamattyǵyn alýǵa nıetti 16 myń ótinimdi qarastyrýdamyz. Bul óz kezeginde Qazaqstan ekonomıkasynyń qaýqarly ári demokratııalyq memleket ekenin kórsetedi. Sonymen qatar elimiz bolashaqqa nyq senimmen qadam jasap otyr. Osyǵan baılanysty kóptegen adamdar ózderiniń búgingi jáne keleshek ómirin Qazaqstanmen baılanystyrǵysy kelip otyr. Sondyqtan otandastarymyzdyń sany arta túsetini óte qýanyshty»,- dep atap ótti.
Osy oraıda Memlekettik hatshy Elbasynyń tıisti Jarlyǵy qabyldanǵannan keıin jaýapty memlekettik organdar elimizdiń jańa otandastarynyń tezirek beıimdelý máselelerin jyldam jáne jaýapkershilikpen sheshý kerektigin atap ótti. Taratylǵan málimetterge qaraǵanda, Qazaqstan azamattyǵyn alýǵa nıet bildirgen adamdardyń sany artyp otyr. Táýelsizdik alǵan jyldar aralyǵynda Qazaqstan azamattyǵyna 600 myńnan astam adam, onyń ishinde olardyń edáýir bóligi sońǵy birneshe jylda qabyldandy.
