1,6 mlrd teńge jymqyrǵan: «Sarqan aýdany boıynsha bilim bóliminiń» bas býhgalteri 8 jylǵa sottaldy

ASTANA. KAZINFORM – Taldyqorǵan qalalyq soty «Sarqan aýdany boıynsha bilim bólimi» MM bas býhgalteri K. Qurmanǵalıevaǵa, sol bólimniń býhgalterleri A. Muratova men A. Qalabaevaǵa, «Qazposhta» AQ aýdandyq ýchaskesiniń bastyǵy A. Takenge, «Aıdana» bóbekjaı-baqshasy meńgerýshisiniń m. a. N. Balǵabaevaǵa jáne Jetisý oblysy ІMAB kameraldyq baqylaý bóliminiń basshysy Ý. Japabaevqa qatysty úkim shyǵardy.

— Qurmanǵalıeva, Qalabaeva, Muratova jáne Taken bilim bólimi qyzmetkerleriniń shottaryna belgilengen jalaqydan artyq aýdarý jolymen 1,6 mlrd teńge somasynda bıýdjet qarajatyn jymqyrǵany úshin kináli dep tanyldy. Balǵabaeva, Qalabaeva balabaqshada aýdıt júrgizbeý syltaýymen olardyń aqshalaı qarajatyn ıemdengen Japabaevqa para berýge oqtalǵany úshin kináli dep tanyldy. Qurmanǵalıevaǵa 8 jylǵa, Qalabaeva, Muratova jáne Takenge 7 jylǵa bas bostandyǵynan aıyrý jazasy taǵaıyndaldy, — delingen Antıkor habarlamasynda.

Balǵabaeva men Japabaevqa tıisinshe 1,2 mln teńge jáne 1 mln teńge aıyppul salyndy.

Sonymen qatar, sottalǵandar memlekettik qyzmette jáne kvazımemlekettik sektor sýbektilerinde qyzmet atqarý quqyǵynan ómir boıy aıyryldy.

Sot aktisi zańdy kúshine engen joq.

Aıta ketelik Antıkor WhatsApp chat-botyn iske qosqan edi, eger jemqorlyq týraly habarlasańyz syıaqy alasyz.