«1,6 mlrd dollar azdyq etedi: Toqaev Qazaqstan men Ulybrıtanııanyń jańa seriktestik baǵytyn aıqyndady
ASTANA. KAZINFORM — Aqordada Prezıdent Qasym-Jomart Toqaev Ulybrıtanııanyń Saýda jónindegi memlekettik mınıstri, lord Anas Sarvarmen kezdesti. Bul týraly Aqorda málim etti.
Memleket basshysy elimiz Birikken Koroldikpen ekijaqty qarym-qatynasty damytýǵa aıryqsha mán beretinin atap ótti.
— Qazaqstan men Ulybrıtanııany syndarly saıası dıalog jáne túrli deńgeıdegi belsendi qarym-qatynas baılanystyrady. Sonymen qatar yntymaqtastyqty odan ári keńeıte túsýge áleýetimiz jetkilikti ekenine senimdimin, — dedi Qasym-Jomart Toqaev.
Prezıdenttiń aıtýynsha, Birikken Koroldik Qazaqstannyń negizgi saýda jáne ınvestıtsııalyq seriktesteriniń biri sanalady.
Byltyr ekijaqty saýda-sattyq kólemi 83 paıyzǵa artyp, 1,6 mıllıard dollardan asty. Elimizde 500-den astam brıtanııalyq kompanııa qyzmet etedi.
— Saýda-ekonomıkalyq baılanystardy ilgeriletý jańa jobalar men ınvestıtsııalardy ǵana talap etpeıdi, sonymen birge halyqaralyq ortada eńbek etýge qabiletti adamdar da qajet. Dál osy sebepti Qazaqstan jastaryn álemdi tanyp-bilýge, dúnıetanymyn keńeıtýge, kóp til úırenýge, eń áýeli halyqaralyq qarym-qatynas quraly sanalatyn aǵylshyn tilin meńgerýge shaqyramyn, — dedi Qasym-Jomart Toqaev.
Prezıdent kezdesýde Ulybrıtanııa Premer-mınıstri Endrıý Bernemge jyly lebizin joldap, ony Qazaqstanǵa saparmen kelýge shaqyrdy.
Lord Sarvar elimizben strategııalyq seriktestiktiń dáıekti túrde ilgerilep kele jatqanyna kóńili tolatynyn jetkizdi.
Sondaı-aq brıtanııalyq bıznes jobalarǵa qoldaý kórsetip, Qazaqstanda qolaıly ınvestıtsııalyq klımat qalyptastyrǵany úshin Prezıdent Qasym-Jomart Toqaevqa alǵys aıtty.
— Elińizdiń qarqyndy damyp kele jatqanyn úlken qyzyǵýshylyqpen qarap otyrmyz. Halyqaralyq kún tártibindegi negizgi máselelerge qatysty ustanymdarymyzdyń uqsastyǵyn joǵary baǵalaımyz. Bizdi ashyqtyq, seriktestik, ınnovatsııalar, ózara senim men erkin saýda baılanystyrady. Strategııalyq seriktesterimizben qarym-qatynasta yntymaqtastyqtyń joǵary deńgeıine saı keletin naqty nátıjege qol jetkizýge nıettimiz. Bul qatarǵa Qazaqstan da enetini sózsiz, — dedi Anas Sarvar.
Memleket basshysy men Ulybrıtanııanyń Saýda jónindegi memlekettik mınıstri gýmanıtarlyq yqpaldastyqty nyǵaıtýdyń, akademııalyq almasýdy keńeıtýdiń jáne birlesken bilim berý bastamalaryn júzege asyrýdyń mańyzyna toqtaldy.
Prezıdent Ulybrıtanııada bilim berý jáne jas mamandardy daıarlaý deńgeıi óte joǵary ekenine nazar aýdardy.
Budan bólek, kezdesýge qatysýshylar energetıka, kólik-logıstıka, tsıfrlandyrý jáne jasandy ıntellekt salalaryndaǵy yntymaqtastyqty jandandyrý perspektıvasyn qarastyrdy.
