16 mln qazaqstandyqtyń jeke deregi medıtsınalyq uıymdardan taraǵan: mınıstrlik aqparatty joqqa shyǵarmady
ASTANA. KAZINFORM – Densaýlyq saqtaý mınıstrligi 16 mıllıon qazaqstandyqtyń jeke dereginiń taralý faktisine qatysty resmı túsinik berdi.
– Taldaý nátıjesi jarııalanǵan derekter ártúrli kózden alynǵanyn kórsetti. Onyń ishinde 2024 jylǵy 1 sáýirge deıingi medıtsınalyq uıymdardyń aqparattyq júıesinen jınalǵan málimetter bolýy da múmkin. Ol jerde azamattardyń medıtsınalyq jeke deregi joq, - delingen mınıstrliktiń agenttik joldaǵan resmı jaýabynda.
Sondaı-aq, Densaýlyq saqtaý mınıstrligi qazir jeke derekterdiń taralý faktisi boıynsha ýákiletti organdar tekserý is-sharasyn júrgizip jatqanyn habarlap otyr. Osyǵan baılanysty qyzmettik aqparatty jarııalaýǵa shekteý qoıylǵan. Qosymsha málimet tekserý aıaqtalǵannan keıin usynylady.
Odan bólek atalǵan vedomstvo Qazaqstan Respýblıkasynyń «Jeke derekter jáne olardy qorǵaý týraly» zańyna sáıkes medıtsınalyq uıymdar patsıentterdiń jeke derekterin jınaýdy, óńdeýdi jáne saqtaýdy tek zańdy negizde jáne patsıentterdiń kelisimimen júzege asyrýǵa mindetti ekenin eske salyp otyr. Jeke derekterdi óńdeý tek naqty maqsat úshin jáne sol maqsatqa qol jetkizýge qajetti kólemde júrgizilýi tıis, al aqparatqa tek ýákiletti tulǵalar ǵana tehnıkalyq jáne uıymdastyrýshylyq qorǵanys sharalaryn qoldana otyryp qol jetkize alady.
Mınıstrlik sonymen qatar medıtsınalyq uıymdarda aqparattyq júıeni engizý nemese jańartý kezinde aqparattyq qaýipsizdikke baǵa beriletinin habarlady. Onyń nátıjesi boıynsha ýákiletti organ bekitken aqparattyq qaýipsizdikti qamtamasyz etýge qoıylatyn biryńǵaı talaptarǵa sáıkestigi týraly synaq aktisi toltyrylady.
Eske sala ketsek, buǵan deıin 16 mln qazaqstandyqtyń jeke dereginiń qaıdan tarap ketkeni jóninde joramal aıtylǵan edi.
Keıin Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev memlekettik derekqor bazasy buzylmaǵanyn aıtyp sendirdi.
Sondaı-aq 16 mln qazaqstandyqtyń jeke dereginiń taralý faktisine qatysty qylmystyq is qozǵalǵany týraly jazǵan edik.