1,6 mıllıonnan asa qazaqstandyq 90 kúnnen asqan nesıesin óteı almaı júr

ASTANA. KAZINFORM — Tek Astana qalasy boıynsha 116 myń 189 azamat nesıesin 90 kúnnen assa da óteı almaı otyr.

— Qarjy naryǵyn retteý agenttiginiń aqparaty boıynsha, 90 kúnnen asqan nesıesin óteı almaı júrgen azamattardyń sany 1 mln 600 myńnan asyp otyr. Sondyqtan da bizdiń bıylǵy basty maqsat — nesıesin óteı almaı júrgen azamattardy tolyq zańgerlik súıemeldep, keńes berip, qoldaý. Astana qalasy boıynsha 116 myń 189 azamat nesıesin 90 kúnnen assa da óteı almaı otyr. Osy oraıda astanalyq bereshek azamattardyń 30 paıyzyn qamtyp, qoldaý kórsetsek degen meje qoıyp otyrmyz, — dedi «Qaryzsyz qoǵam» jobasynyń Astana qalasy boıynsha mentory Dýlat Myńbaev Astana qalasynyń kommýnıkatsııalar qyzmeti alańynda ótken baspasóz máslıhatynda.

Mentor keltirgen málimetke súıensek, búginde 15 972 astanalyq qarjylyq saýatty arttyrý kýrsynan ótti. 

Aıta ketsek, Memleket basshysy bıyl Joldaýynda halyqtyń qarjylyq saýatyn arttyrý jáne qaryz júktemesin tómendetý máselesine aıryqsha toqtaldy jáne «Qaryzsyz qoǵam» jobasyn jalǵastyrýdyń mańyzyn atap ótti. 

Osy oraıda elimizde mektep qabyrǵasynan bastap qarjylyq saýattylyqty arttyrý ıdeıasy alǵa tartyldy.