16 mamyrǵa arnalǵan aýa raıy boljamy
ASTANA. 16 mamyr. QazAqparat - Búgin el aýmaǵynyń basym bóligi joǵary atmosferalyq qysymnyń yqpalynda bolady, kún jaýyn-shashynsyz ótedi dep kútilýde.
Respýblıkanyń ońtústik-batysynda, soltústigi men shyǵysynda keı jerlerde jańbyr jaýady, naızaǵaı oınap, jel kúsheıedi. Bul týraly Qazgıdrometke silteme jasap QR TJM-niń baspasóz qyzmetinen habarlady.
Atap aıtqanda, Aqmola, Atyraý, Qaraǵandy, Shyǵys Qazaqstan, túnde Pavlodar, kúndiz Soltústik Qazaqstan, Qostanaı oblystarynda jeldiń ekpini sekýndyna 15-20 metrge artady.
Qyzylorda, kúndiz Batys Qazaqstan oblystarynda shańdy daýyl kóterilip, jeldiń jyldamdyǵy 15-20 m/s bolady.
Elimizdiń batysynda, ońtústiginde, ońtústik-batysy men ortalyǵynda joǵary órt qaýpi saqtalmaq.
Jaqyn táýlikter ishinde ońtústiktiń, ońtústik-batystyń jáne shyǵystyń taýly ózenderinde sýdyń kólemi aýytqıdy. Syrdarııa ózeniniń Ońtústik Qazaqstan men Qyzylorda oblystary ornalasqan aýmaqta aǵynnyń rettelýine baılanysty sýdyń kólemi qubylady. Elimizdiń basqa sý nysandarynda gıdrologııalyq rejımde aıtarlyqtaı ózgeris baıqalmaıdy.
