16 qańtarǵa arnalǵan aýa raıy boljamy
ASTANA. 15 qańtar. QazAqparat - Respýblıka aýmaǵynyń basym bóliginde burynǵysha atmosferalyq frontaldyq aǵyndardyń ótýine baılanysty keı jerlerde qar jaýyp, burqasyn soǵady, qatty jel turyp, tuman, kóktaıǵaq saqtalady, tek respýblıkanyń batysynda aýa raıy ashyq bolady.
Bul týraly Qazgıdrometke silteme jasap, QR TJM baspasóz qyzmeti habarlady. Aqmola oblysynda keı jerlerde tuman, kóktaıǵaq kútiledi, aýmaqtyń basym bóliginde jel 15-20 m/s-qa jetedi, keı jerlerde uıytqyp 25 m/s-qa deıin kúsheıedi. Almaty oblysynyń keı jerlerinde tuman kútiledi, túnde Jalańashkól aýdanynda jeldiń kúsheıýi 18-23 m/s-qa deıin jetedi. Jambyl, Ońtústik Qazaqstan, Qyzylorda, Mańǵystaý oblystarynyń keı jerlerinde tuman, kóktaıǵaq oryn alady, jeldiń ekpini 15-20 m/s-qa deıin kúsheıedi. Atyraý oblysynyń keı jerlerinde tuman, kóktaıǵaq kútiledi, Qostanaı oblysynda keıbir jerlerde tuman túsedi, kóktaıǵaq bolady, jel 15-20 m/s-qa kúsheıedi. Pavlodar oblysynda keı jerlerde burqasyn kóteriledi, jel 17-22 m/s-qa kúsheıedi. Soltústik Qazaqstan, Shyǵys Qazaqstan oblystarynda keı jerlerde burqasyn aralas jeldiń kúshi 15-20 m/s-qa jetedi. Qaraǵandy oblysynda burqasyn, keı jerlerde jeldiń ekpini 15-20 m/s-qa deıin kúsheıedi.
