16 qalada tutanǵan alaý bir arnada toǵysyp, Ýnıversıadanyń ashylýyn álemge pash etti - Baıbek
ALMATY. QazAqparat - Elimizdiń 16 qalasynda jaǵylǵan alaýlar bir arnada toǵysyp, 28-shi Búkilálemdik qysqy Ýnıversıadanyń ashylýyn búkil álemge pash etti, dedi Almaty qalasynyń ákimi Baýyrjan Baıbek búgin ál-Farabı atyndaǵy qazaq ulttyq ýnıversıtetinde ótken Ýnıversıada Alaýynyń jaǵy saltanatty sharasynda, dep habarlaıdy QazAqparat tilshisi.
Alaý tutatý saltanatynda sóz alǵan qala ákimi Almaty bul tarıhı oqıǵaǵa 5 jyl daıyndalǵanyn aıtty.
«Ýnıversıada Almatynyń damýyna tyń serpin berip, ajaryn asha tústi. Jańadan sport ǵımarattary salynyp, qalamyzdyń kórkine kórik qosty», - dedi Baýyrjan Baıbek.
Quttyqtaý sózinde qala basshysy Alaýǵa qatysty «ot», «Otan», «Ot Ana» sózderiniń mán-maǵynasyna toqtaldy.
«Halqymyz úshin qymbat «Otan», «otbasy» degen uǵymdardyń túbiri osy ottan shyqqan. «Otan - qýat, otbasy - shýaq» deıdi dana halqymyz. Ýnıversıada qazaq jerinde, Almaty qalasynda tuńǵysh ret ótip otyr. Ýnıversıada alaýyn tutatý rásimi elimizdiń barlyq óńirlerinde ótip, oǵan 100-den astam JOO stýdentteri qatysady. Astanadaǵy Nazarbaev ýnıversıtetinde Alaýdy Elbasy ózi tutatty. Elimizdiń 1000-nan astam azamaty ony alyp júrý qurmetine ıe boldy. Mine, Ýnıversıada alaýy Almaty tórine de kelip jetti», - dedi Baýyrjan Baıbek.
Óz sózinde Almaty ákimi sportshylarymyzǵa sáttilik tiledi.
«Álemdik jarystarda top jaryp júrgen sportshylarymyzdyń osy joly da baǵy jansyn. Barshamyz qoldaý kórseteıik», - dep sáttilik tiledi.
Aıta keteıik, búgin Almatyda ál-Farabı atyndaǵy qazaq ulttyq ýnıversıtetinde 2017 jylǵy 28-shi Dúnıejúzilik qysqy Ýnıversıada Alaýy estafetasynyń basty alaýy jaǵyldy.
Ál-Farabı atyndaǵy qazaq ulttyq ýnıversıtetiniń úzdik stýdenti Aısýlý Ernııazova estafeta alaýyn Almaty ákimine tabys etti. Alaýdy Baýyrjan Baıbek Olımpıada chempıony Dmıtrıı Balandınge tabystap, sáttilik tiledi.
Endi Alaýdy velleıbolshy sulý Sábına Altynbekova, Dáýlet Turlyhanov, Amalbek Tshanov syndy elimizge tanymal tulǵalar qala kóshelerimen alyp júredi. Aıta keteıik, resmı tasymaldaýshy «Eır Astana» kompanııasy elimizdiń aımaqtarynan 15 Alaýdy Almaty qalasyna jetkizdi.
Buǵan deıin uıymdastyrýshylar 2017 jylǵy Almatydaǵy 28-Dúnıejúzilik qysqy Ýnıversıadanyń Alaý estafetasy erekshe oqıǵa ekenin aıtty. Onyń ereksheligi - Ýnıversıada alaýy Qazaqstannyń túkpir-túkpirinde, 16 qalada jaǵylyp, Almatyda basty alaýǵa ulastyrylýynda.
Alaý Qazaqstannyń 16 qalasyna baryp, jer betimen 200-den astam shaqyrymdy, áýede (ushaqpen tasymaldaný) 2300 shaqyrymdy júrip ótedi.
Alaýdy tutandyrýdyń saltanatty rásimi 25 qańtarda Astana qalasynda, Nazarbaev Ýnıversıtetinde ótti. 26, 27 jáne 28 qańtarda 14 oblys ortalyǵynda alaý oty jaǵyldy. 29 qańtarda aımaqtardyń ozyq stýdentteri Alaýdy Almatydaǵy tuǵyryna jetkizdi.
Jobaǵa 1000 alaýger qatysty.
