16 elden 2 myńnan astam robot: Beıjińde álemdik oıyndar bastaldy
ASTANA. KAZINFORM — Senbi kúni keshke Beıjińde adam tárizdi robottar arasyndaǵy ekinshi Dúnıejúzilik oıyndardyń ashylý saltanaty ótti. Oǵan 16 elden 666 komanda jáne 2 056 robot qatysyp jatyr, dep habarlaıdy Sınhýa.
Bes kúnge josparlanǵan jarys «Muz lentasy» ulttyq konkımen júgirý stadıonynda ótedi. Bıylǵy oıyndar baǵdarlamasyna 51 jarys sanaty engizilgen.
Ashylý saltanatyna myńǵa jýyq gýmanoıd robot qatysyp, osy saladaǵy tehnologııalyq jetistikterin jáne olardyń óndiriste, kúndelikti ómirde qoldanylý múmkindikterin kórsetti.
Bıyl robottardyń múmkindikterin kórsetýge arnalǵan jarystar ımıtatsııalyq alańdardan naqty nysandarǵa kóshirildi. Atap aıtqanda, robottar zaýyttarda, qonaqúılerde jáne arnaıy jabdyqtalǵan úılerde synaqtan ótedi. Osylaısha adam tárizdi robottardy jaı ǵana tehnologııalyq demonstratsııa quraly emes, naqty jumys atqaratyn júıe retinde damytýǵa basymdyq berilip otyr.
Oıyndardy Beıjiń qalasynyń halyq úkimeti, Qytaı medıakorporatsııasy (China Media Group), Dúnıejúzilik robototehnıka salasyndaǵy yntymaqtastyq uıymy jáne Azııa-Tynyq muhıty aımaǵyndaǵy robototehnıkadan álem kýbogynyń halyqaralyq keńesi birlesip uıymdastyrdy.
Uıymdastyrýshylardyń aıtýynsha, mundaı jarystar tehnologııa almasýdy, ónerkásiptik yntymaqtastyqty jáne fızıkalyq ortada áreket etetin jasandy ıntellekt tehnologııalaryn damytýdy kózdeıdi.
Adam tárizdi robottar arasyndaǵy alǵashqy osyndaı oıyndar 2025 jylǵy tamyzda ótti. Oǵan 16 elden 280 komanda jáne 500-den astam gýmanoıd robot qatysty.
Budan buryn Qytaıda robot 100 metrge júgirýden álemdik rekord jańartqany belgili boldy.
