16 bala terezeden qulaǵan: Qyzylordada qutqarýshylar dabyl qaqty

QYZYLORDA. KAZINFORM - Ótken jyly Qyzylorda oblysy boıynsha balalar terezeden qulap ketken 16 derek tirkeldi. Bıyl mundaı jaǵdaı bolǵan joq.

Oblystyq Tótenshe jaǵdaılar departamentiniń mamandary munyń sebebin ata-analardyń bala ómirine nemquraıly qaraýymen baılanystyryp otyr.

- Kópqabatty turǵyn úılerdiń basym kópshiligi oblys ortalyǵynda. Sondyqtan jazataıym oqıǵalardyń basym bóligi Qyzylorda qalasynyń úlesinde. Jyl basynan beri oqys oqıǵa tirkelmedi. Biraq bul arqany keńge salýǵa sebep emes. Biz jumysty ári qaraı jalǵastyra beremiz, - dedi departamenttiń basqarma bastyǵy Beıbithan Spanov.

Ol balalardyń terezeden qulaýynyń birneshe sebebin atap ótti. Basty sebep – balalardyń baqylaýsyz qalýy jáne terezede ýaqytsha bekitkish tordyń bolmaýy.

- Terezeniń qorǵanysh qabaty bolmasa, moskıt toryn paıdalanbaýdy suraımyz. Óıtkeni ony qaýipsiz deı almaımyz. Odan bólek, terezeniń janyna jıhaz qoımaýdy jáne balalarǵa qarapaıym qaýipsizdik erejelerin úıretýdi suraımyz, - dedi Beıbithan Spanov.

Bul baǵytta sala mamandary qaýipsizdik sharalaryna baılanysty úgit-nasıhat jumystaryn júrgizip keledi.