16 aqpanda Tarazda Toqmádı isi boıynsha sot protsesi bastalady
TARAZ. QazAqparat - Tarazda «Depýtattyq korpýs» uıymdasqan qylmystyq tobynyń serkesi, bıznesmen Murathan Toqmádıge qatysty qylmystyq is boıynsha aldyn ala sot tyńdalymy bolady, dep habarlaıdy «QazAqparat» HAA tilshisi.
Jambyl oblysynyń qylmystyq ister jónindegi mamandandyrylǵan aýdanaralyq soty ókilderiniń aıtýynsha, birinshi otyrysta sottyń quramy jarııalandy, al taraptar oǵan qarsylyq bildirgen joq.
Aıyptalýshylardyń alqabıler soty protsesine qatysý jaıly ótinishi qabyldanbady. Budan tys, qorǵaý sottalýshyny da, advokatty da foto jáne vıdeojazbaǵa túsirýge tyıym salýǵa ótinish berdi. Sot ony nazarǵa aldy.
Bankır Tátishevtiń ólimine qatysty is boıynsha basty sot otyrysy 16 aqpanǵa belgilendi. Qylmystyq istiń kólemi 79 tomdy quraıdy. Protseske sýdıa Azamat Tilepov tóraǵalyq etedi.
Eske sala keteıik, 2004 jyly M. Toqmádı bankır Erjan Tátishevtiń ólimine kúdikti bolǵan. Sol kezde Taraz qalalyq soty sol jaıtty «abaısyzda qazaǵa ushyratý» babymen tirkep, bir jylǵa bas bostandyǵynan aıyrý jazasyna kesken edi. Biraq keıinnen ol túrmeden raqymshylyqpen shyqty. 2017 jylǵy qazanda Almaty qalasynyń Almaly aýdandyq soty M. Toqmádıdi bopsalaǵany jáne zańsyz qarý-jaraq saqtaǵany úshin úsh jylǵa japty.
2017 jyly shildede Bas prokýratýra Jambyl oblystyq sotynyń qaýlysyna sáıkes, bankır Erjan Tátishevtiń ólimine qatysty qaıta ashylǵan jaǵdaıattar boıynsha tergep-tekserý júrgizdi. Qazan aıynda protsessýaldyq prokýror M. Toqmádıge oqylǵan úkimdi boldyrmaý jáne qylmystyq is boıynsha sot óndirisin qaıta bastaý týraly ótinish berdi. 2017 jylǵy qazanda telearnaǵa bergen suhbatynda M. Toqmádı bankırdi Jambyl oblysy Qordaı aýdanynyń Otar stantsııasynyń mańynda ań aýlap júrgende óltirgenin moıyndap, qylmys qashqyn olıgarh Muhtar Áblıazovtiń tapsyrmasymen jasalǵanyn aıtty. Budan tys, jemqorlyq faktisin moıyndaý - QR ІІM jedel tergeý tobynyń basshysy Erjan Artyqbaevqa aqshalaı syıaqy berilgeni týraly da aıtyldy.
M. Toqmádıge QR 1997 jylǵy Qylmystyq kodeksiniń 96-babynyń 2-bóligindegi «j», «z» («adamdar toby, aldyn ala sóz baılasý arqyly adamdar toby jasaǵan; paıda tabý maqsatymen, sol sııaqty jaldanyp ne qaraqshylyqpen, qorqytyp alýshylyqpen ne bandıtızmmen ushtasqan adam óltirý») tarmaqshalarymen kózdelgen qylmysty jasady degen aıyp taǵylǵan.
